AMAM-i 3 buba Tour de Hills tetoktepba ayonger

Dimapur, September 23 (TYO): Adventure & Motorsport Association Mokokchung (AMAM) teloki Tour de Hills 3 tetoktepba Mokokchung district nung taküm November ita 4-5 nü tashi agitsü ayongogo.
Mokokchung jila tenteter küm 125 ajungba Jubileemong nüngtem nung AMAM-i Mokokchung District Administration, Mokokchung District Sports Council (MDSC) aser Mokokchung District Art & Culture Council (MDACC) nungi temela agir külen iba tetoktepba ya ayongogo.
Iba motor rally sentong ya shilem 2 – oda shilem agiba aser tetoktepba shilem küma lemsar agitsü renema lir.
Tetoktepba shilemji TSD yimya nung agitsü aser oda shilem agirtem nema ‘The Jubilee Adventure Trail’ lenmang nung jajadaktsütsü renemogo.
Iba motor rally sentong nung shilem agirtemi Mokokchung district kübok densemba sorkar tesepti 10 aser yimtsüng 40 dak tema sema tajemba agi kilometer 250 shi gari anir jajatsü.
Ano külen, AMAM-i kümshi ayongba 3 buba Mokokchung AutoX tetoktepba sentonga November ita 6,7 aser 15 nü Mokokchung kübok Imkongmeren Sports Complex nung agitsü ayonga lir.
Iba sentong anaprongla den sentakba osangtsüsang tali jangjashitsü jangrartemi Public Relations Officer (PRO), AMAM, Ato den mobile no. 9612543378 ajanga tongteprateptsü akok.