AMAM website lapokogo: Mkg nung Tour De-Hills 3 Nov nung agitsü

Mokokchung, October 01 (TYO): Mokokchung Addl. S.P, Yanren Ngullie-i Adventure & Motorsports Association Mokokchung (AMAM) telok indang website tanü Brehostibar nü Mokokchung kübok Hotel Metsüben nung lapoktsüogo. Tsüngrem tenzüker, Lanu Atsongchanger ajanga temaotsü meshia sarasademtsü.
Tanü nungi tenzüka AMAM telok den sentakba osangtsüsang ajunga www.amamonline.com nung angutsü aser par telok den amammokokchung@gmail.com ajanga email agi ayong ayonga tongteprateptettsü.
Motor sports meimer nisung ishikati külemi lungjemer 2012 tenzükba sülen AMAM teloki mapang shia motor rally sentong balala ayonga aruba osang bushiteta lir.
“Mokokchung jila tenteter küm 125 ajungba den tapetsüa, AMAM-i par website lapokba atema kanga pelar,” ta tongti tesemdangeri ashi.
“AMAM-i mapang shia sentong tajung ayonga lanurtem atema saisapongtsü sabang tajung renemtsüba atema par telok nem tenüngsang agütsür. Tarutsü mapang nunga par teloki lanurtem ajungmesotsü imlar,” ta pai shisem.
Ano, Mokokchung jila küm 125 tain akümba nüngtem nung Mokokchung District Sports Council (MDSC)-i AMAM nem Tour De-Hills 3 ta ajaba Motor Rally sentong taruba November ita 4-5 nü tashi ayonga agitsü melaogo.
Iba sentong den repsema, AMAM-i kümshi ayongba Auto/Motor cross tetoktepba sentonga taruba November ita 6-7 nü agitsü sentong renema lir.
Tour De-Hills tetoktepba nung shilem agirtem nem Mokokchung district kübok administrative block ajak aser yimtsüng 45 shi kongshia kilometer 300 shi toktepa jajadaktsütsü sentong aliba osang ka AMAM ketdangpurtemia metetdaktsüogo.
Iba sentong ya tetoktepba aser oda gari anishia jajatsü densema shilem 2 küma lemsar agitsü renema lir.
Tetoktepba shilem nung gari anishir aser lenmang tuyur na dang shilem agitsü melatsü saka oda shilem agiba shilem nungbo shilem agiba taa sen timba agütsür nisung 2 dak temai shilem agitsü melatsü.
Tour De-Hills 3 sentongji November 4 nü Imkongmeren Sports Complex Mokokchung nungi tenzüktsü aser November 5 nü kasa tesem nungjisa tembangtsü. November 3 aonung Chungtiayimsen nung yipzüktsü aser iba aonungji shilem agirtem tangu sadoka kazütsü asoshi kenten aser wawa menü sentong tapu balala akatsü. Tayiptsü süki aser abensüoshi pei sasa anepalutsü ta ketdangpurtemisa shisem.
Tour De-Hills mapang Mokokchung jila küm 125 ajungba osang prokshitsü aser iba sentongji Mokokchung küm 125 benjong tetenzüker asütsü ta ketdangpurtemi metetdaktsüogo. Mokokchung jila küm 125 ajungba inti sentonga taküm December ita amongtsü asoshi terenemshiba tulu agitsü tenzüka lir.
Ano külen, Auto/Motor cross tetoktepba 1000cc tekübok, 1000c ser tema aser Sports Utility Vehicles (SUV) densema shilem 3 tashi lemsar agitsü aser Motor cross nung novice aser export shilem küma lemsar Imkongmeren Sports Complex nung agitsü renemogo.
Tetoktepba nung takok angur nem agütsütsü asoshi renemba senpet aser sempet osang tarutsü mapang metetdaktsütsü ta parnokisa shisem.
Iba tetoktepba nung shilem agitsü jangrartemi shilem agitsü shiti taruba October ita 5 nü nungi tenzüka AMAM website nungi agizüktsü mesüra Auto Cares, Milak Junction, Mokokchung nungi meshizüktsü akok.
Iba tetoktepba den sentakba osang tali jangjashitsü jangrartemi mobile no. 9612543378 ajanga tongteprateptsü akok.