Amarnath camp nung tzünglu tesashi ajanga nisung asem asü

Baltal nung tzünglu tesashi aluba sülen Amarnath Yatra camp anasa garitem tzü aser ali agi metsüngbangba aser  army temi nüburtem kümzüba noksa nung angur.

Srinagar, July 25 (Agencies): Baltal nung aliba Amarnath Yatra tesem nung army aser lendong nungi kümzükertemi aonung sangwa tzünglu tesashi aluba ajanga timatemertem kümzüktsü maparen tulu tenzükogo. Iba lendong nung tajemba agi nisung asem asü aser tenet sama.
Army ketdangsertemi, yatra lenmangji Honibar nü anü maidangsa lapoktsü merangtsü, ta ashi.
“Army temi Balta nung tamang aieni aoertem matokteti alirtem kümzüktsü asoshi kanga meranga inyaktepdar,” ta defence ministry nung otongdar Lt. Col. N.N. Joshi Srinagar nung ashi.
“Tzünglu kanga sashia aluba ajanga Baltal gate aser Rangamor na yongtsü tesem asem tashi nung anentsüh alua lir,” ta Joshi-i ashi.
19 Garhwal Regiment nungi sepaitemi iba tesem nunga kümzükba maparen tenzükogo. 24 Rashtriya Rifles nungia Quick Reaction Team (QRT) ka den Gagangir camp nungia Sonamarg tesem tongogo.
Army ketdangpur kati ashiba agi, süki tenet aser gari aika iba tzü agi metsüngba-a lir.
Nisung tashi den külemi bulldozer tem ajanga lenmang tem lapoktsü merangdar.
Anentsüh oktoktsü asoshi anentsüh aluba tesemtem nung maparen tenzükogo aser ango tzübo ka anasa aliba lenmang nembanger aliba-a lapoktsü inyakdar.
Baltal nung tzünglu tesashi arudang asürtemji Rajasthan nungi Prakash’er jala arishi küm 13, Pooja, aser Rajasthan nungisa Kailash’er jabaso, arishi küm 12, Vikram na den ano tebur tanur ka lir. Tasem buba tasümangji kanga menurang ang.
Iba lendong nung nisung tuku yiru aser nisung 780 tashi army camp-i anir ogo. Tamang aieni aoertem parnok 1,500 tashi Bhandvas-i anir oa lir aser dokan 12 ponger ogo, ta otongdar jagisa ashi.
Sama’er mangurtemji Maiser, Anil Sahu, Ashaq Sahid Mir, Reyaz Ahmed Lone, Mustaq Ahmed, Ramdevi aser Fayaz Ahmed Mir nunger ta jangjaogo, ta ketdangsertemi metetdaktsüogo.
Tasür ana ya camp anasa aliba dokan nung inyakertem lir, ta police-i ashi.