Amazon.In-i yimti tasen 6 nung oset ayoktsü

Bengaluru, December 22 (Agencies) : Tanü Brihostibarnü Amazon.In-i India tesem balala nung parnok grocery aser kidang nüngdakba osettem, Amazon Pantry inyakyim ajanga parnoki tang meyoki aliba yimti tasen trok nung tenzüka ayoktsü sangdongogo. Itemji Delhi, Faridabad, Gurgaon, Mumbai, Mysuru aser Pune yimyitem lir.
Par company-i iba inyakyim ya Hyderabad aser Bengaluru nungbo taküm tenüzokogo.
Amazon Pantry ajanga nüburtemi groceries aser kidang nüngdakba osettsüset brand 250 nungi anogo ka nung nüngdakba oset 5000 dak tema alitettsü, ta Amazon sangdong ka ajanga metetdaktsü.
Kasa sangdong nung ashiba agi, Amazon-i yimti balala nung apetba osettem den chiyungtsü balala aser shampoo, sü ashiba sapon; tanur indang nüngdakba osettem aser parok chiyungtsü aser shiruru atema nüngdakba oset dena ayoktsü.
Iba pantry ajanga order asüba osettemji tananübosa talirtem ket tongtsütsü mechi nung yimti anasa aliba Amazon warehouse nungi Pantry Box balaka nung aleper yoktsü, ta sangdong nung shia lir.
“Amazon Pantry ajanga onoki item yimtitem nung customer ajak temulung südakja inyaktettsü imlar,” ta Amazon India nung Category Management FMCG Director Saurabh Srivastava-i ashi.