Ambati Rayudu-i cricket asaya nungi anenba sangdongogo

New Delhi, Chiteni/July 3 (Agencies): Middle order batsman Ambati Rayudu-i Bodhbarnü pa cricket asaya formate ajak nungi anenba metetdaktsüogo. Times of India den jembiba mapang BCCI CEO Rahul Johri-i ashiba agi, BCCI’s General Manager for cricket operations, Saba Karim-i Rayudu ket nungi pa asaya nungi anenba metetdakja email ka agizükogo.
e-mail nung Rayudu-i yamai zülutsü: “Ni iba asaya formate ajak nungi anentsü asoshi telemtetba agiba nenok nem metetdaktsür. Ni BCCi aser Hyderabad, Baroda, Andhra aser Vidharbha densem ni shilem agiba state associations ajak dang kanga pelaba lemsateper.”
Arishi küm 33 tain Rayudu India tenüng nungi One day Internationals (ODIs) asaya 55 nung shilem agiogo aser iba mapang pai 47.05 average nung run 1694 yanglua lir.
Paisa linük tenüng nungi Twenty20 Internationals asaya trok nung asayaogo.
World Cup atema India team sangdongba mapang Rayudu dak sendakba nung kanga bulua sensaksemogo.
World Cup atema selection committee-i pa squad nungi zütokba sülen iba onük ya linük ajunga nung atsütepa jembiogo.
Rayudu ya World Cup atema standby asaya ama shim saka pa squad-i mai kechiyong Shikhar Dhawan melena Rishabh Pant shim aser Vijay Shankar melentsü asoshi Mayank Agarwal anioka liasü.
Kasa mapang nung World Cup squad sangdongba sülen Vijay Shankar shimba dak sendakba nung Rayudu-i anemsü agi tweet asüba ajanga ajaki jembi tenzük. Asayar shimba telok nung mendenbubai Shankar ya three dimensional abilities keta aliba atema shim ta ashiba Rayudu-i anemsü agi telangzüba agüja liasü.
World Cup squad nung asayar ana tashi yiruba sülena team nung maniokba sülen Rayudu-i international cricket nung joko ojang dang asayatsü asoshi telemtetba agiogo.