Ambedkar mangdang ataloktsü atema India den inyaktsü: UN

United Nations, April 14 (Agencies): Tepetzük tia nung alirtem atema BR Ambedkar ya alima atema tongtibang noksa ya lir ta yashi United Nations (UN) tongti ketdangser kati ashiba den külemi, Ambedkar mangdang ataloktsü atema UN-i India den külemi yaritepa inyaktsü, ta metetdaktsü.
Sustainable Development Goals nükjidong ataloktsü nung rangloker tang mezüng United Nations (UN) nung India linük Temzüng yanglusang aser Dalit nunger temeten atema inyaksang, B R Ambedkar asoba anogo benjungmung sentong nung okila jembidang UNDP administrator, Helen Clark-i, “UN Development Programme (UNDP) tenüng nung UN nung iba tongtibang tasoba anogomung amungdang ni India tetshir,” ta ashi.
“2030 onüktem nung mangdang ataloktsü aser Ambedkar indang mangdang- alima nung  sensakertem aser tepetzük tia nung alirtemi nüchi  tia angutsü atema onoki maneni India den inyaktsü,” ta UN secretary general menden tasenba atema candidates rongnung densema alila, Helen Clark-i ashi.
UN-i Ambedkar asoba anogomung 125buba ya anogo ka jilia Bodhbarnü mungogo. UN nung Permanent Mission of India-i Kalpana Saroj Foundation aser Foundation For Human Horizon den senteper Ambedkar asoba anogo atongtsü anogo ka lia April 13 nü yangi UN Headquarters nung sentong ka ayonga amung.
UN Development Group nung menden, Helen-i diplomat tem, shisashirtem aser Ambedkar tangatetba sülen anidakertem den jembia liasü.
Küm 60 tejaklen ama Ambedkar tangatetbatemji tanüa kanga tapet lir ta shia taoba New Zealand Ato kilonser Helen-i, Ambedkar mapatem- sentoka aliba teloktem nem tashi agütsütsü, labour laws melenshitsü aser nisung ajak kaketshitsü angutsü atema inyakba ajanga India aser alima nung tepetzük tia nung alirtem atema paji tongtibang nisung ka akum, ta ashi.
Iba anogomung sentong nungsa ‘Combating inequalities for the achievement of SDGs (Sustainable Development Goals)’ onük nung o lemtep kaogo. Iba o lemtep nung Ambedkar’er alma mater Columbia University nungi Professor Stan Kachnowski aser Associate Professor Anupama Rao na den Harvard University lecturer, Christopher Queen nungeri shilem agia liasü.
Ambedkar ya 1891 küm April 14 nü aso aser pa 1956 küm asüba sülen 1990 küm pa nem India nunger tematiba civilian award ‘Bharat Ratna’ agütsü.