Ambedkar taküm nungi tatishitsü agitsü Modi-i NCC cadets ajungshi

New Delhi, Jan. 28 (Agencies): Tanü Ato kilonser Narendra Modi-i National Cadet Corps (NCC) dang India Temzüng yanglur tongti, Bhimrao Ambedkar taküm otsü nungi tatishitsü agitsüla, ta ayongzük.

Republic Day benjungmung nung shilem agitsü atema linük tesem balala nungi New Delhi nung adenshia alir NCC cadets dang Modi-i, taküm Republic Day ya Ambedkar arishi küm 125 ajungba küm tenjir, ta ashi.

“Loktiliba nung züngtokba ajanga zübo tarok kettsür, atamata nisungibo ibaji mokoktettsü. Ajisüaka Ambedkar bo atamata nisung ka masü liasü. Pa taküm nung mezüngmeshiba aser sentokba ajangshiaka pai linük Temzüng yanglu, iba nungji ashishitsüsa tako mali mesüra lokti anema maliasü,” ta NCC rally nung adenertem dang Modi-i ashi.

“Asen Temzüng ya linük ajungkettsü atema leniba ka lir aser asenok longjema alitsü ajungshiba den linük atema asen teinyaktsütem tuyur,” ta paisa ashi.

Modi-i, NCC cadets kaketshirtem dang, Republic Day benjungmung atema taoba ita ka tashi parnok Delhi nung amungba mapang tajung kechisa angazüka lir, item ajakji benshitsüla, ta ayongzüka liasü.