Amber Heard-i balaba nungi USD million 7 tenla agütsütsü

August 25, 2016: Actress, Amber Heard-i la kinüngbu Johnny Depp den balaba nungi US sen million 7 timtemer tetsürtem nem tenla agütsütsü nangzükogo.
La kinüngbu Depp tena balatsü atema ita asem tashi keno kayonga aruba sülen Hombarnü (August 22, 2016) keno ajak tembangogo, aser tena balaba tezüngzüktep nung aliba ama lai arishi küm 53 Depp dang nungi US sen million 7 shi angutsü.
Balatsü atema keno akaba mapang arishi küm 30 tain, Amber Heard-i, tena kibong kümer ita 15 ali piyong Depp-i la dak teka sangshia liasü, ta ashi.
Tena balaba nungi anguba senji lai magitsü saka iba senji nüngdakbapurtem yaritsü atema tenla agütsütsü ta lai shiogo, ta TMZ osang ajanga metetdaktsü.
“Iba tenlaji ACLU (American Civil Liberties Union) tsüngda kasasa alemtsü aser talisa teburi azükba tetsürtem yariba den külemi ni tesüiba küm 10 tashi melungteta inyakba hospital, Children’s Hospital of Los Angeles yaritsü,” ta lai sangdong ka ajanga ashi.
Ken o akaba mapang piyong Heard-i lai sen arishia mali, ta jembia aruogo.
Lai, “Kü atema sen shilem kecha mali aser kodanga yamaji masütsü, ajisüaka ni iba senji charity nem tenla agütsütsü, ibaji inyakba ajanga peisasa pei temeten atema nokdaktsü makokertem yaritsü,” ta ashi.
Ano külen Children’s Hospital of Los Angeles-i sangdong ka ajanga, “Lai melungsoa tenlaba ajanga CHLA nung küm shia kanga mejungi shiranger tanurtem taküm kümzüktsü treatment balala agüja taneptsü ngudaktsütsü,” ta ashi.