Amenba Yaden-i National Level Handloom Expo lapoktsü

Mongulbarnü Industries & Commerce Parliamentary secretary, Amenba Yaden-i Naga Shopping Arcade, Dimapur nung National Level Handloom Expo lapoktsüba angur.

Dimapur, November 10 (TYO) : Handloom expo ayongzüka agiba ya handloom osettsüset yokshitsü atema dang masü saka asen linük nung sü atakba senmang wazüktsü, kümzüktsü aser ajungkettsü atema lir, ta Industries & Commerce Parliamentary secretary, Amenba Yaden-i ashi.
Ibala sentong ajanga asen state nung handloom sector ya mapa angudak maparen ka akümtsü akokba sayur, ta Naga Shopping Arcade, Dimapur nung anogo 15 nü National Level Handloom Expo lapoktsüdang Amenba Yaden-i ashi.
Paisa lanu putu dang handloom sector ajungkettsü aser nüngtugu kümdaktsütsü ayongzük.
Weavers/ societies külemi sabang ka nung longjemtsü asoshi tang ya mapang tajung lir. Ibaji ajanga nenoki peii yangluba osettem shishilembatettsü aser ano customers nem handloom/ textiles products tasentem metetdaktsütsü akok, ta tongti tesemdangerisa ayongzük.
Paisa ashiba agi, iba Expo ajanga local sü ataker aser teka mapa inyakertem sensaksemtettsü aser tebilembatem lemsateptsü ta amanger.
Expo lapoktsüba sülen parliamentary secretary Amenba-i stall tem sema senzü. Tan ayongzükba Expo nung Assam, Madhya Pradesh aser Tamil Nadu nungia shilem agirtem lir.
Iba sentong ya Nagaland Handloom & Handicrafts Development Corporation Ltd-i ayongzük aser Office of the Development Commissioner (Handlooms), Ministry of Textiles, Govt of India, New Delhi-i teyari agütsür.