Amenba Yaden-i Tzüdikong Town Salang semzüktsü

Dec. 11 2017 anogo nung ‘Tzüdikong Town Salang’ semzükba sentong nung Industries & Commerce & NIDC Parliamentary Secretary, Wb. Amenba Yaden-i jembiba aser salang noksa nung angur.

Dimapur, Dec. 12 (TYO): Tzüdikong Ad-Hoc Town Committee (TATC)-i yangluba Town Salang 11th Dec. 2017 nü Tzüdikong Town nung Industries & Commerce & NIDC Parliamentary Secretary, Wb. Amenba Yaden-i party workers aser Public aika adenshia lia semzüktsüogo.
Pai iba sentong nung jembidang tongtipangsa Nagaland Pulp & Paper Company revival sentong junga bener motetba atema sasaba metetdaktsü.
Metetsümonga Hindustan Paper Corporation Ltd-i iba sanctioned sen tangalen amshi aser Centre Government-ia kechi ang meshitetba tensa ka nung lir, aji oda süaka Nagaland State Government-i tanga lenmang kar bushidar ta paisa shisem.
Iba sentong nung ADC Tuli, Wb. Rhosietho Nguori-i jembidang, tang Nagaland nung lokti timbakati Government dak dang metaloker alir, ano sanction aruba timbaka chiadoker saka TATC puri parnok sasa sen anepalua pei merang meranga Town yimkong salang tajung ka yanglutetba atema tenüngsang agütsür, ta ashi.
Paisa iba mapa tajung ajanga Naga nunger lokti aika atema lesson tajung ka asütsü ta kanga temolung asüba metetdaktsü.
Sentong nung TATC Vice Chairman Wb. O. Benjung Jamir-i tarurtem pelaa agizük, Wb. L. Chuba Secretary-i ankup tepela O jembi aser TTBC pastor Rev. Temshi-i temoatsü meshia sarasadem. Sentong nung mendenji Sp. Temsü Jamir liasü.