America brand ‘Aéropostale’ India-i aruogo

November 07, 2015: America lanur brand ‘Aéropostale’ India nung tan mezüng süa Saket, New Delhi nung aliba mall, ‘Select City Walk’ nung store amenokogo. Iba outlet ya Bollywood film actress, Sonam Kapoor-i lapoktsü.
India nung Arvind Lifestyle Brands Ltd-i iba brand ya Honibar nü lapok. Iba store ya ajanga tebur aser tetsür ajak asoshi süoshi tapu balala den tsüngküm nung agitsü oset aika angutsü.
“America nung kanga nüngtugu brand ‘Aéropostale’ India lanurtem asoshi bener arutetba atema onok kanga pelar. Iba den külemi Arvind Lifestyle Brands Limited den loktepba atema kangsa pelar. Arvind ajanga brand tasen tudaktsüba nung kanga yarir. Tanü nungi tenzüka onoki India nung iba brand tali tajunga nung ajungkettsü imlar,” ta Aéropostale, Inc nungi International & Global Licensing nung Tatong Tir, Kenneth Ohashi-i sangdong ka ajanga metetdaktsü.
Arvind Lifestyle Brands Ltd den lokteper India linük ajak len Aéropostale brand renloka aotsü nükjidong lir. Parnoki küm asem tsüngda nung dokan 30 aser mall balala nung parnok oset ayokdak 25 lapoktsü sentong lir.
Aéropostale ya jean süoshi, sweatshirt (hoodies) aser t-shirt nung kanga nüngtugu lir aser parnok ket nungi India nunger arishi küm 14 nungi 25 tsüngda alirtem atema süoshitem angutsü.