America nung rür la mopung tesashi aonba yipru süngjema kümogo

America nung rür la mopung tesashi aonba yipru süngjema kümogo

Honibarnü Philadelphia nung rür la yipru tesashi aruba süngjemer külen tetsür ka lenmang nung jajaba noksa nung angur.

New York, January 24 (Agencies): United States anüdoklen tsütsü rür la mopung tesashi aonba yipru tulu Deobarnü nungi tesüngjemba kümogo. Iba yipru ajanga nisung 16 tashi süogo.
United States nung iba yipru tesashi ya Hokolbar aser Honibar anogotem nung arua liasü aser ibaji ajanga New York aser Washington yimti tem nung aliba nisung million 85 dak kongshi.
New York, Philadelphia, Washington aser Baltimore nung tayimtsü 4,400 tashi mesenzüi anena ata aser aienlen jajaba garitem den nüburtem aienlen jajatsü nokdanga liasü.
Tasüba 16 ji Arkansas, Kentucky, New York, North Carolina, Maryland aser Virginia yimtitem nung atalok aser nisung 200,000 tashi electric mongui kanga timtem. Yipru aitba tesem nung National Guard 2,200-i yaritepdar.
Iba yipru Honibar aonung süngjema akümba ajanga Deobar anepdang 7:00 ako nungi aienlen mejajatsü ozüng züngja aliba lapoktsü. Gari jajaba dena akhi ama lapoktsüogo.
“Gari jajaba aser shishilembaba mapa yabo kodanga manendaktsüner ajisüaka iba yipru kanga sashia aru,” ta New York State Angh, Andrew Cuomo-i ashi.
Mopung kanga sashia aonba agi anüdoklen aliba tzüküm len tzümetsüng adoktsü akok, ta National Weather Service ajanga tekümdangtsü metetdaktsür liasü.
New Jersey nung tzüküm tsütsü aliba tesemtem nungbo rür aser tzü agi mobang.
New York nung bus gari jajaba, ali tema aser telung nung jajaba train, mesuem tem, aser dokantem ajak shibangtsüba den asayamung sentongtema thinena liasü.
Washington nung Metro aser bus jajaba hopta piyong atema shibanga ata.
Philadelphia aser New Jersey yimtitem nunga gari aser metro jajaba timba ka aendaktsü. Lenmang nung gari meyirjang aikasa anentena liasü.
Ketdangsertemi Deobarnü tashi nung nüburtem tim atemba ajema kümdaktsütsü asoshi kanga meranga inayakogo aser New York nung anogo tom nungibo gari aser tayimtsütem jajatsü tenzükogo.
Ketdangsertemi ashiba agi, Iba yipru ajanga sen dollar billion ka dak tema takoksa aludaktsütsü.

You must be logged in to post a comment Login