America tatartemi India nung Khristan NGO atema tebilemtsü akar

Washington, December 07 (Agencies): Narendra Modi’er sorkari bendanglen nungi India nung aliba mulungtet teloktem dangi senotsü teyari aruba anema ozüng takang yanglushiba atema US tatartemi tebilemtsü kaa jembiogo.
Congress züngsem aser House Foreign Relations Committee mendenbuba, Ed Royce-i, “Iba onük atema jembiba ajanga teyari balala kanga nüngdaka alir tanur 145,000 nem teyari agütsüba mesongtemtsü ta amanger, aser America nunger kibongtemi maneni kanga sensakertem atema shisaliok aser chiyungtsü asoshi ita shia US sen 38 yoktettsü ta amanger,” ta ashi.
Yaküm September ita nung US Secretary of State, John Kerry-i New Delhi semdangba mapang nunga pai External Affairs Minister, Sushma Swaraj den kasa onük lemsatepa liasü.
India sorkari tenük yokba mulungtet telok rongnung Compassion International (CI) densema lir, aser Kerry-ia India sorkar dang ibaji reprangshitsü asüngdanga liasü.
Sangdong ka ajanga Royce-i, “India nung kanga sensak tia nung aliba tanurtem nem teyari tulutiba agütsüba kiji telokji ibai (CI) lir,” ta ashi.
“Iba atema onoki India ketdangsertem den ita teku ser ghonda aika indokogo, aser ketdangsertemi iba ya agientsü meranger ama reprangteter,” ta Royce-i ashi.
Compassion International ya Khristan charity tentet ka lir, ajisüaka parnoki India nung tamangba yimsü meyipdaktsür ta aiben tai tonglokja arur.
India nung CI maparen nokdangra ibaji ajanga kinü aser tanur 130,000 taküm nung kongshitsü, ta paisa ashi.
Ano Cruxnow.com editor, John L. Allen Jr-ia, Narendra Modi Ato kilonser akümba sülen Hindu yimsü ajungkettsür aser mulungtet teloktem nem tenokdangba agütsür, ta ashi.
Ajisüaka India sorkaribo, sorkar mapatongji mulungtet telok kar anema masü saka mulungtet telok ajaki ozüngtemji benshitsüla, ta ashir.