America ya tamangertem linük ka lir : Donald Trump

Washington, April 16 (Agencies): America ya maneni tamangertem indang linük ka lir ta Deobarnü US President Donald Trump-i Easter osang lemsatepdang ashi.
Trump-i süia aoba benjung indang otsü lemsatep aser Yihuda nungeri masetshii nokdakba atema tenüngsang agütsü.
“Putu aika süia arudang, Yihuda nungeri reshikangshi ka madak ka ajangshia arur, saka parnoki item ajak kokteta aser jenjang tajungba nung liteta arur. Tanü Israel ji parnok tamang aser timtem koktetba atema nüngshilung ka ama nokdaka lir” ta pai ashi.
“Easter Sunday nung Khristan temi Yisu Khrista shia aruba aser teti tatem makaba indang tenangzükba atema benjungteper. Iba anogo ya akhümtsübuba aser külemba temeshi anogo ka lir. Iba mapang asen sensotem tamang ajanga linük ajungalen prokshir. America ya tamangertem linük ka lir” ta US President-isa metetdaktsü.
“America ya tashitait linük ka lir kechiyong nisungtemi talenba kecha melii külemteter. Iba linük nung mezüng arurtemi ibaji nangzük aser asen tasütait nokinketertemia senso ajak atema iba tenangzükba kümzüka arur” ta paisa ashi.
Tamangba yimsü atema lendong tulutibaji kiralongraba lir ta Trump-isa ashi pai tawa Islamic State-i Egyptian Coptic tenlaki ana amakba aitsü.
“Iba tesempatsü mapa onoki kukua aitsür. Tasür kibongtem onoki mangyim tejashi lemsateper aser parnok nem tashi agüjang ta sarasademtsür. Tsüngrem taochi ajanga, tasüba madak takümi teti takok angutsü. Nüjiso ajanga talenba kokteter aser tamang ajanga tesübu samatsür” ta paisa shisem.
“White House-i nenok atema rarar. Onoki America nunger shia atema rarar. Senso ajaki lendong nungi kümzüka ayutsü aser yimjung nung alitsü atema onoki rarar” ta Trump-isa America nunger ayongzüka jembi.