American Airlines-i billion 12 agi Boeing 787 tayimtsü 47 alir

San Francisco, Rongchii 07 (Agencies) : US dollar billion 12 jenjang Boeing 787 Dreamliners tayimtsü lir tenet alitsü atema American Airlines-i mekazüka yuogo saka Airbus A350s alitsü order agüja alibajibo magitsü thitema yutsüogo.
Parnoki alitsü order asüba 787-8s tayimtsü metsür anabo 2020 küm nungi tenzüka renemer arutsü aser 787-9s jibo 2023 küm nungang tenzüka arutsü.
American Airlines-i ashiba agi, mapang apir tang amshiba Boeing 767s aser 777s den ano European Airbus A330s tayimtsütemji tanem-tanemi melenyonga aotsü.
Tang alitsü renembaji meyokteper American Airlines indang 787s tayimtsü ajak agi 89 ajungtsü.
Tang tayimtsü alitsü atema jejnang atakzüka alibaji US dollar billion 12 süaka tatem nungbo par airlines-i agütsübaji iba dang nung jagi ishiba asütsü.
“Boeing 787 aser Airbus A350 & A330neo den angatettepa telemtetba agitsüji tasak liasü saka parnoki kanga nentaka inyaktepba atema onoki tayimtsü yangluba telok anaprong dang pelar. Tatem nung onoki 787 tayimtsü alitsüjiang shimtet,” ta American Airlines president, Robert Isom-i metetdaktsü.
“American Airlines-i 787 Dreamliner agitsü temulung agütsüba ajanga onoka kanga dang nüma tangteter,” ta osang ka nung Boeing Commercial Airplanes president Kevin McAllister-i metetdaktsüogo.
Boeing ketdangpurtemisa ashiba agi, tang tashi nung Boeing 787 tayimtsü alitsü order agüja alibaji 1,350 lir.