American Baptist temzüng melenshitsü makok

~ I. Zülu Pongen, Mongsenbai ward.

American Baptist koba asen limai Dr. Clark-i bentsür aru, ya ajak dang tajungtiba. Ya Tsüngremi asen Aor aser Naga nunger kanga meimba temaitsü lir. Alima ajaki chuba yimli / Communist yimli dang nungi Democratic yimli ya tajungba ta agizüker, yamaji American Baptist ya Democracy dak amendaker bener aor. Nübor ajaki mulongba nung tebang medema temzüng yanglushia aor. Iba temzüng yagi tamangba nung tanela temeshi sentong mejangjunger. Shibai akoker, shibai bendanga agütsüteter, aser Tsüngremi shiba nem kechi sempet agütsür. Ya Tsüngremi mulongba tamang temzüng lir, koba asenoki ken kaket tetenzüklen zülua angutsü, ya tenyartem tamang temzüng.
Dr. Clark ya Naga nunger aser Aor atema Paul lir, pai asenok nem yimsü tajung bener arutsüogo, Tsüngrem tenüng asanger. Yihuda aser Isreal nunger nem tamasa Mosa ajanga tajung-tamajung nübortemi angatettsü asoshi Mosa ozüng agütsü, ibai Tsüngremi agütsü, saka yagi nübortem tanela majangzüktettsü ta angatetaa Mosa ozüng melena Yisu taochi ozüng alima dangi bener arutsü.
Yamaji asen Naga lima dangi tamasa Tsüngremi Dr. Clark aser kinüngtsü yok. Iba sülen nübortemi revival ka yokang ta ayimten, aji oda meimlaba Tanela Temeshi Revival milak agi asenok semdangogo. Saka tamasabo Tsüngrem tenzüker aikati yabo yimsü tasen ka ta bilem aser nokdangtsü merang, saka ya-ang shitakba Tsüngremi yokba asenoki sarasadema ken nunga mejemba ya liasü. Anungji, iba dak alaka kecha tanga principles asen Aor dangi bener marutsüla ta shidanger. Aji oda principles tasenji bener arutsü jembia renema melira, nübor meratatsü atema tangatettsü karbo paper nung agütsü nung ajungtsü ta shidanger. Ni 3rd November 2015 adokba Ao milen nung Rev. O. Yashi ocet tila ka nung shisemba angu aser ni aoksa aser süngmanga bilemer ya kechi ? ta ni shisadang. Tanü putu Tsüngrem tenzüker shisa tulu abenba tashir pi bendanger inyakyim meteter aika alitsü akok, yamaji tamangba nunga terara melenshinüa bilema bener aruba asütsü akok. Pai Ao milen nung- ABAM ajanga asen Aorbo Baptist principles melenshir tanga Denomination inyakyim ka benoka ibaji agitsü bangjemer ta zülua angu. Ya ngua alima ya kongi aor ta rataa bilemer.
Ni bilemer aser amanger, American Baptist distinctive Principles dak amendaker tenyartem tamang temzüng ama asen lima nung tanela temeshi inyakyim dak alaka kecha principles menüngdaker ta bilemer. Kodang yimsüyimpong tasen tesayuba arudir nübortem mangmangteptsü aser Baptsit temzüng nungi mepilatsü nübor aika adoktsü idangji nenoki bener aruba maparenji temjena bener moutettsü tamangba nung tepila lendong tulu arutsü nükla nung angur, ya ochi o lir. Shidi süra ibai aika rasaa zülutetsü kechi agi mulong masü? Kechi timtem ali? American Baptsit yagi kechi lenmang tajung nokdanger? tasenbaji komala? Yagi tang dang nungi tajungbaji koda kümtettsü (?) ta asüngdangtsü tapu aika lir, saka tatsü agi nübor tebilemba koma lir aji angadangnüa o lapoktsür.