American Idol nung Katy Perry-i tetendanger mapa inyaktsü

May 17, 2017 (Agencies): ABC indang 2018 American Idol nung tetendanger asütsü asoshi mezüng Katy Perry tenüng sangdongogo.
ABC indang American Idol season 15 tashi agia arur taoba küm April nung tembanga liasü aser iba sentong nung shilem agitsü asoshi maongka agütsüba pelar, ta lai ashi.
“Sempet tajung aika alir indang pongmang nungi asangsang dangi anir arutsü asoshi ‘American Idol’ nung ni mezüngbuba tetendanger shimba asoshi tushia bilemer. Ni teti ken tasen angar aser kentener lanurtem dak nungi sempet tajungtiba adokdaktsütsü kanga yongyar,” ta ‘Chained To The Rhythm’ ken atenla-i ashi.
New York City nung 2017 May 16 anogo sentong ka aliba mapang ABC ajanga iba iba show tanaben nüburtem dangi bener arutsütsü osang ya sangdong.
“Katy Perry-i anir iba ‘American Idol’ tenzükshitsü maongka anguba asoshi onok kanga pelar. La ya kangadang sempet tajung aketba nisung ka lir aser la ama tasü tait aser sempet aketer kati lanurtem nem parnok pongmang agi asangsang kümdaktsütsü ya koda jangratemtsü. Onok kanga tia kaogo,” ta ABC Entertainment tir, Channing Dungey-i ashi.
Mongulbar anepdang ‘The Ellen Degeneres Show’ nung shilem agiba mapang, lai tajangzük alitsüsa melenshitsüba ajanga parnoki ni tetendanger ka ama shimtsü südi, ta Katy Perry-i ashi.
Ellen Degeneres ya tamalen ‘American Idol’ nung tetendanger ka liasü aser lai “‘American Idol’-i tanaben arutsü,” ta ashidang Katy Perry-i ‘Hao’ ta tekolak arakzüa ashi.
2009 küm Paula Abdul-i iba show toktsüba mapang Katy Perry ya ‘guest judge’ ka ama arua shilem agia liasü.