American missionary tem maru asübo Naga nunger iba jenjang nung melila

Dimapur, May 24 (TYO): America nungertem, talisa American missionary temi Naga nunger dangi Khristan yimsü bener aruba atema Nagaland Chief Minister, Dr. Shürhozelie Liezietsu-i parnok dang pelaba metetdaktsü.
America nunger Missionary temi asen lima nung osangtajung mesangdong asübo, Naga nunger iba jenjang nung melila, ta paisa ashi.
Bodbarnü Rev Jeffrey S Buffkin-i anir Virginia Baptist Missions aser Baptist Collegiate Ministry nungi telok kati Nagaland Civil Secretariat nung pa den ajurutepdang, Dr. Shürhozelie-i iba pelaba olen lemsatep.
Nagaland ya ali agi meketbanga aliba tesem ka dang masü saka linük tulutemi meketbanga lir. Ajisüaka, Naga nunger shinga tanga tamangba yimsü magizük, saka Naga nungeri tangar dang ang osangtajung prokshir, ta Chief Minister-isa America nungi aruba telok dang ashi.
Naga yimten tebilemtsü aliba ajanga Nagaland nung bilemba ama terenlok mali. Ajisüaka, teti atema telemtetba ka agiba sülen, kanga kara renloktsü imlar, ta paisa tebilemba lemsatep.
Rev. Buffkin-i Naga nunger dang pelaba olen ka ashidang, Naga nunger shinga sülen masü aser wadang ajaklen state nung terenlok lir, ta ashi.
Naga nungeri nisung shibelenba maparen anema mapa kanga junga inyakba angudang kanga pelar, ta paisa shisem.