Amit Shah dangi NE nunger kümzüktsü atema shidi zülu

Guwahati, March 24 (Agencies): Coronavirus wara adokba sülen Northeast nunger dak tenük yoka mapa tamajung inyakba atema Assam legislative assembly nung opposition lennir, Debabrata Saikia-i Union Home Minister Amit Shah dangi shidi ka züluogo.
Linük nung coronavirus azüoktsü atema inyakba mapang ka nung, tesem kar nung kin kari northeast state tem nungi Mongoloid mesükba nisungtem dak tashiyim benshir aser tim masüba mapa inyaker ta Assam Congress lennir-i Amit Shah dang ashi.
“Northeast nunger dang ‘chinkis’, ‘lah achiba kin’ ta shia mezüngmeshiba tatalokba aika ni angashiogo” ta Saikia-isa ashi.
Pune nung aliba shopping mall ka nung tantsür kati Northeast nungi aiür ka China nunger ta temulung melemi bilemba agi o tamajung shia merenshi aser coronavirus prokshir ta tai tongloktsü, ta paisa Amit Shah dang shidi nung shia lir.
“Ano, New Delhi nunga kasa onük atema Northeast tsür ka dak tebur kati metzü metsüloktsüba atalokogo. Angelica Aribam ta ser tetsür ka social media nung kanga mezüngmeshi aser iba jagi lai Delhi Police den FIR ka benoktsüsa aküm” ta Saikia-isa metetdaktsü.
Iba ya tashiyim mapa ka dang masü saka kin dak rangloker inyakba mapa ka aser Scheduled Caste and Scheduled Tribe (Prevention of Atrocities) Act, 1989 alema lir, ta paisa shisem.
“Union home minister-i Northeast dak alia tanüngba state aser union territory nung ketdangsertem dang coronavirus wara nung ajemdaker Northeast nungertem tashiyim mesüra mezüngmeshiba nungi kümzüka ayutsü atema tetuyuba agütsütsü mepishir” ta Assam Congress lennirisa shidi nung shia lir.
“Talisa, Delhi Police dang Angelica Aribam nem timtem agütsürtem pua ozüng tapet agi merenshitsü atema nai mapa inyaktsü ayongzüker” ta Saikia-isa shisem.