Amit Shah-i Assam BJP den ajurutepa jembitsü

Guwahati, November 20 (Agencies): Bihar election nung BJP tamakok anguba sülen 2016 küm election agitsü aliba state, Assam dak timla ajak yur linük nung BJP Tir, Amit Shah-i state nung aliba BJP party nung inyakertem den tan ita tatemlen ajurutepa jembitsü.

Assam BJP tongti tezülur, Bhabesh Kalita-i, Amit Shah-i Dibrugarh nung November 27 nü party nung inyakertem den ajurutepa jembitsü, ta metetdaktsü.

“Dibrugarh parliamentary constituency nungi ‘Booth Level Workers’ ajak iba senden nung adentsü. Iba senden ya tang state nung yimsü tesüdak party, Congress atsüngdoktsü asoshi ajungmesoba senden ka asütsü,” ta Kalita-i ashi.

Tan ita Assam nung BJP-i Lok Sabha constituency 14 tashi nung taruba küm election asoshi renemshiba sentong agiogo.

Assam nung tesüiba küm BJP-i Lok Sabha menden 14 nungi menden 7 angubaji state yimtenren otsü nung BJP-i meden timtiba ngutetba mezüngbuba lir.

BJP nung lennir tejentemi, Shah-i tan state semdangba ajanga party inyakyim aser nükjidong tali tashi itshitsü, ta ashi.

Parnoki ashiba agi, Bihar nung party tamakok anguba sülen 2016 Assam election nung nung Congress madak takok angutsü asoshi BJP-i tashi ajak agi bendanga agüja  inyaktsü.

“State nung tang kanga nüngdaka aliba mapang ka nung linük party tir-i semdangba ajanga party tamendakdak aser inyakyim nung tali tashi itshitsü,” ta party lenniri ashi.

State nung assembly election agitsü küm ka lia Bihar nung party-i tamakok aluba ajanga Assam BJP kanga aoksa kechiba süra Bihar election nung BJP-i takok angutsü kanga teimla tulu liasü.

BJP nung lennirtemi Bihar tamakok ajanga Assam nung timtem kecha malutsü ta ashir, ajisüaka iba tamakok sülen 2016 assembly election atema parnoki party inyakyim ajak kanga aroka ia reprangshidar, ta state nung BJP lennirtemi ashi.