Amit Shah-i Assam nung BTC terenlok atema crore 1000 sangdong

Guwahati, February 10 (Agencies): Bodhbarnü BJP National Tir, Amit Shah-i, Assam nung Territorial Council (BTC) terenlok atema Centre sorkari sen crore 1000 dak tema agütsütsü ta sangdongogo.
Kokrajhar nung Bodoland People’s Front (BPF)-i ayongzükba Bodo Accord Day sentong nung jembidang Shah-i ibaji nangzüka liasü.
BTC nung tang BPF tashi nung lir, aser taruba assembly election atema taoba ita BJP aser BPF na loktepogo.
Shah-i senotsü teyari crore 1000 sangdongba ya Congress tebang nembangtsütsü atema sangdongba ama lir, kechiyong taoba ita Ato kilonser Narendra Modi-i Kokrajhar semdangba mapang senotsü teyari agütsütsü mesangdongba atema Congress-i aija liasü.
BJP-BPF teloktepi state sorkar aküm nungang Assam aser BTC nung terenlokji takoktsü ka asütsü ta shia Shah-i, Congress yimsüsüba kübok terenlok tsütsü state tesüleni atsüngzüka alur, ta aitsü.
Shah-isa, Bangladesh nungi ozüng alema bendangertem state telungi aitba ajanga Assam lisopurtem mapa mangur, ta ashi. BJP tashii arudaktsüra bendangertem state telungi aitba nokdangtsü, ta paisa shisem.
“Linük nüjiso anguba mapang takartiba state pongu rongnung Assam densema liasü, ajisüaka mapang timbaka Congress-i yimsü asüba state ya linük nung sensaktiba state pongu jenjangi aluogo,” ta paisa shisem.