Amit Shah-i Himanta nem ticket magütsüba jangjashitsü; Mezüngbuba list nung NE nungi candidates 16 dena lir

Guwahati, March 22 (Agencies): Bharatiya Janata Party (BJP)-i Brihostibarnü 2019 Lok Sabha elections atema mezüngbuba candidates list metetdaktsü. Iba nung linük kübok state 20 nungi candidate 182 shima lir.
Linük nung lennir aika nem BJP ticket agütsüogo saka Assam nungi BJP lennir Himanta Biswa Sarma nembo magütsü. Northeast nung BJP tashi aitba maparen nung Sarma-i tongtipang shilem agi saka pa nem ticket magütsü.
Iba atema Amit Shah-i osang ka jangjashitsüogo. “Iba telemtetba ya party aser Assam state atema bilema agi” ta pai ashi.
“Assam election selection committee aser Assam BJP züngsemtemi Lok Sabha elections nung Himanta Biswa Sarma toktepdaktsütsü atema shidang, saka North-East Democratic Alliance (NEDA)-i BJP central leader tem den jembiteper pa Assam nung maneni Minister aser NEDA chairman ama inyakdaktsütsü lemtet” ta BJP National president Amit-i metetdaktsü.
“Assam BJP unit aser BJP ajungai iba telemtetba agizükdaktsünür. Iba telemtetba ajanga Assam aser northeast nung terenlok aser tajangzük angutsü” ta paisa shisem.
BJP parliamentary Board-i Lok Sabha elections atema shimba candidate tem tenüng metetdaktsüba nung Northeast state balala nungi candidate 16 dena lir.
Candidate tem rongnung Assam nungia 8 lir aser parnokji Guwahati nung Queen Ojha, Mangaldai nung Dilip Saikia, Lakhimpur nung tang teinyakdak MP Pradan Baruah, Jorhat nung state minister Tapan Gogoi, Dibrugarh nung tang teinyakdak MP Rameswar Teli, Autonomous district nung Harensingh Bey, Silchar nung Rajdeep Roy aser Karimganj nung Kripanath Mallah lir.
BJP-i Assam nung tang teinyakdak MP tejen asem nem ticket magütsü aser tejak pezü tasen shimok.
Taoba Rajya Sabha aser Lok Sabha MP aser Union minister Bijoya Chakravarty nem Gauhati constituency nungi ticket magütsü. Pa melena Queen Ojha nem ang BJP-i ticket lemzüktsüogo.
Maneni, Mangaldoi constituency nung Ramen Deka melena Dilip Saikia nem ang ticket agütsü. Deka ya Assam state unit tenzüker rongnung ka lir.
Pa kümsük anaben tashi Lok Sabha MP ka liasü aser Assam BJP nung president den national level nunga mapa aika inyakogo.
Maneni, Jorhat constituency nungi Lok Sabha MP Kamakhya Prasad Tasa nem ticket magütsüi tang teinyakdak Assam Power Minister Topon Kumar Gogoi nem agütsü.
Taküm Lok Sabha elections atema BJP-i Assam nung menden 10 nungi tokteper aser parnoki Tezpur aser Nawgong Lok Sabha constituency tem atema ano memetetdaktsü lir.
Assam nung BJP-i Kaliabar, Barpeta aser Dhubri constituency tem nung metokteptsü lemtet aser item menden asem Asom Gana Parishad (AGP) nem lemzüktsü. Maneni, parnokisa Bodoland Peoples’ Front (BPF) nem Kokrajhar menden lemzüktsüogo.
Arunachal Pradesh nungi Lok Sabha menden ana nung tang teinyakdak MP aser union minister of state for home Kiren Rijiju-i Arunachal East menden aser Arunachal BJP president Tapir Gao-i Arunachal West nung tokteptsü atema shimogo.
BJP-i Manipur Inner menden atema KK Ranjan Singh aser Manipur Outer Lok Sabha menden atema H Shokhopao Mate (Benjamin) shim.
Mizoram Lok Sabha menden ka atema BJP-i Nirupam Chakma aser Sikkim nung Laten Tshering Sherpa shim.
Tripura nunga BJP-i Tripura West menden atema Rebati Tripura aser Tripura East atema Protima Bhaumik na shimogo.