Amit Shah-i PM Modi indang degree sayua Kejriwal aitsü

May 09, 2016 nü New Delhi nung BJP Tir, Amit Shah aser Union Finance Minister, Arun Jaitley nati osangbenertem senden ka nung Ato kilonser, Narendra Modi indang tazüngba degree sayuba noksa angur. 

New Delhi, May 09 (Agencies): Delhi Chief Minister, Arvind Kejriwal-i yazü agi ochi ama jembir ta aija tanü BJP Tir, Amit Shah-i Ato kilonser, Narendra Modi indang  degree sayuogo.
Osangbenertem senden ka nung jembidang BJP Tir, Shah-i, “Onoki Delhi University nungi Ato kilonser indang Bachelor of Arts aser Gujarat University nung MA degree nüburtem dang sangdonger,” ta ashi.
Iba sentong nung  Finance Minister, Arun Jaitley-a liasü.
“Arvind Kejriwal-i Ato kilonser indang degree ji taila ta jembiba ajanga yazü kati ochi kümdakja nüburtem raramatadaktsütsü merang,” ta Shah-i ashi.
Jaitley-ia, Modi indang degree taila ta aitsürtemji degree taila aliba lenirtem party nungi lir, ta ashi. “Item ama yimjak nung sangdong, aser osang tejangja memeteti kar aitsübaji taaktsü mapa ka lir,” ta paisa ashi.
Yazü nung tai tongloktsüba atema Kejriwal-i tatok meshitsüla, ta BJP-i takhangba agütsüogo.
Taoba hopta osangbenertem senden ka nung Aam Aadmi Party (AAP) tongti lenir aser Delhi Chief minister, Kejriwal-i, Delhi University records nung “Narendra Damodardas Modi” tetshia mali aser 1975 küm nisung ka tenüng agi, “Narendra Kumar Mahavir Prasad Modi” Delhi University nung admission agia liasü, ta ashi.
Delhi Chief Minister-i, Modi indang tazüngba degree ji nüburtem dang sangdongtsüla, ajisüaka pai taila certificate amshia linük nüburtem ashioktsüogo, ta aija liasü.
Yakünü-a AAP-i, Delhi University (DU)-i 1975 küm nungi 1980 küm tashi record bushiogo, ajisüaka parnoki Ato kilonser, Modi nem BA degree agütsüba kuli mengutet, ta ashi. AAP-isa,  Alwar nung alir nisung ka tenüng agi Narendra Kumar Mahavir Prasad Modi nem degree agütsü, ajisüaka Narendra Damodardas Modi nem magütsü, ta ashi.
2014 Lok Sabha election affidavit nung Ato kilonser Modi-i pa DU nungi BA degree anguba indang shia lir.