Amit Shah-i sayuba PM Modi indang degree ji taila: AAP

New Delhi, May 09 (Agencies): Hombar nü osangbenertem senden ka nung BJP-i Ato kilonser, Narendra Modi indang degrees kulikaket sayuba sülen ghonda ka tsüngda Aam Aadmi Party (AAP) lenir, Ashutosh-i, BJP tongti, Amit Shah-i sayuba degree kulikakettemji taila lir, ta ashi.
Osangbenertem senden balaka nung AAP lenir Ashutosh-i, “Amit Shah ji Tsüngrem masü. Osangbenertem senden ka nung degree kar sayua itemji shitakba degree kulikaket lir ta ashitsü makok,” ta ashi.
Delhi University-i Modi nem July 17, 1975 nü agütsüba B.A. (Pass) Part I nungji pa tenüng “Narendra Kumar Damoderdas Modi” ta lir, ajisüaka July 20, 1976 nü agütsüba second year marksheet nungji pa tenüng “Narendra Damoderdas Mody” ta agüja lir aser iba dak sentakba nung AAP lenir Ashutosh-i kulikaket ana sayua, kaket anaprong nungji Ato kilonser Modi tenüngji kasa masü, ta ashi.
“Amit Shah aser Arun Jaitley nati kanga merangdangogo, ajisüaka jakdaka puogo. Degree kakettem nung Ato kilonseri pa tenüng melenba affidavit ji tenati sayutsü nüngdaker,” ta AAP lenirisa aitsü.