New Delhi, January 24 (Agencies): Deobarnü BJP Tir Amit Shah tanaben party Tir inyaktsü atema shimshiogo; pa tanaben shimtsü asoshi Ato kilonser Narandra Modi densema party nung pangdak lenirtemi pa tenüng benoka liasü.
Tanü New Delhi nung BJP headquarters nung Amit Shah tanaben Tir shimba sentong nungji party indang Margdarshak Mandal züngsem LK Advani aser Murli Manohar Joshi na densema BJP lenir tain aika maden.
Amit tanaben shimshitsü asoshi Union minister tem aser BJP-i yimsüsüba state tem nungi chief minister temi Shah tenüng benoka liasü.
Shah tenüng benoker rongnung Union minister tem- Rajnath Singh, JP Nadda, M Venkaiah Naidu aser Anant Kumar nunger liasü. Ano Vasundhara Raje, Raghubar Das aser Shivraj Singh Chauhan densema BJP chief minister tema aikati pa tenüng benoka liasü.
Amit tanaben shimshiba osang sangdongba sülen Rajnath Singh-i, “Amit Shah lenisüba kübok party-i takok tulu angutsü ta ni kanga tamang akar,” ta ashi.
Union minister Venkaiah Naidu-ia, “Pa ya tetemsütiba, pa dak ayongmesotsü sempet lir, asalendong shisa tajung lir, aser talisa ozü tangatetba nung kanga nendaka inyaker ka lir,” ta ashi.
January 28 nü BJP parliamentary board senden mena Shah tanaben agizüktsü.
Shah Tir küm asem abensa inyakogo. Rajnath Singh Tir teinyaktak nung Union Minister akumba mapang Shah-i Singh menden melenzüka liasü.
2016 küm state aika nung assembly election agitsü lir, anungji iba küm ya Shah atema kanga mazüngi aliba küm ka asütsü. Pa leniba kübok 2014 Lok Sabha election nung BJP-i takok tulu ngua liasü.
Ajisüaka ano külenbo Delhi aser Bihar assembly election nung tamakok anguba atema karibo Shah lenisüba atema tasüngdangba akar.
You must be logged in to post a comment Login