Amitabh Bachchan dang nungi Modi tajungba: Tarun Gogoi

Guwahati, November 9 (Agencies): Bodbarnü demonetization mapa tenzüker küm ka abensaba anogo nung Assam Pradesh Congress Committee (APCC)-i ‘Black Day’ ta ser amung.
Iba mapang taoba Assam Chief Minister, Tarun Gogoi-i Prime Minister Narendra Modi luja jembi.
“Amitabh Bachchan dang nungibo Modi ang actor tajungba lir. ‘Dashyu’ ama Modi-i nübortem dang nungi sen rakzük” ta Gogoi-i ashi.
BJP-i iba kasa anogo nung elections agiang ta Gogoi-isa ayongzük aser 2021 nungi Congress-i linük ketdangsütsü ta shisem.
Paisa Dr. Himanta Biswa Sarma aser Mukul Roy na luja olen ka ashidang, tena BJP nung adenba sülen Satyanarayan kümogo ta metetdaktsü.
Iba sentong nung Indian National Congress lennir, Debabrata Saikia-ia ashiba agi, demonetization ajanga linük nung nübortem nem tajangzük kecha bener marutsü.
Guwahati nung Bodbarnü Congress-i demonetisation anema lungkak aitba sentong ka agidang Assam Pradesh Congress Committee (APCC) president Ripun Bora aser opposition lennir Debabrata Saikia na dena Congress lennir tejen aika police-i apu.
Iba sentong nung Congress lennir CP Joshi-i “BJP-i aniba sorkari demonetization ajanga taküm samaba kibongtem dang tatok meshitsüla” ta takhangba agütsü.
“India nung alirtemi demonetization ajanga kechi tajangzük angu metetnür. Iba inyakyim ajanga shishilemba tilartem takoksa ajuru aser sorkari miima shishilembar tulutem den digital transactions atema sign sütep. Iba inyakyim ajanga aluyimertem aser tanü poksüng atema mapa inyakertem takoksa ajuru” ta Johi-isa ashi.
Sentong agiba sülen Congress züngsemtemi Reserve Bank of India office kima nung mener lungkak aitba atema apusoa ao saka parnok police-i apu.
Külen, National Students’ Union of India (NSUI)-ia Gauhati University nung lungkak aitba sentongtem ayongzüka agi.