Amitabh Bachchan tanü nungi Maharashtra tiger ambassador akümer

Mumbai, Oct. 05 (Agencies): ‘Wildlife Week’ den sentaktepa Sanjay Gandhi National Park ( SGNP) nung Bollywood nung kanga nüngtugu actor Amitabh Bachchan, Maharashtra atema Tiger Ambassador ka ama tanü mezüng nüburtem den ajuruteptsü.

Iba sentong asoshi kanga terenemshiba tulu agidar aesr sentong nung State minister for Finance, Planning aser Forests, Wb. Sudhir Mungantiwar aser tanga minister tema kar adentsü.

Iba sentong nung Bachchan-i SGNP nung molusüngzü aser keyi repranga jajaba nung amshitsü asoshi bus gari ana lapoktsütsü.

Forest department osang ka ajanga ashiba agi, Bachchan aonung ka SGNP, Guest House number 1 nung yipzüktsü aser Bodhbar nü SGNP nung ketdangpurtem den tesem repranga jajatsü sentong lir.

Pa park repranga jajaba mapang ketdangpurtemi pa dang yangji aliba süngtonglitong aser shiruru indang rasaa ashiba den külemi arem ajanga tajangzük agütsüba lemsateptsü.

Amitabh Bachchan ya August 11, 2015 nü Maharashtra nung ‘Save the Tiger’ omen nung ajemdaker ‘Tiger Ambassador’ asütsü shima liasü.

Wildlife Week ya linük tesem ajak nung shiruru kümzüka ayutsü nükjidong nung October 2 nungi 8 tashi nung amunger.