Amitabh Bachchan teti nüngtugu alitsü: Aishwarya Rai

October 04, 2015: Actress Aishwarya Rai Bachchan-i, tuku Amitabh Bachchan teti nüngtugu alitsü, ta ashi.
Amitabh Bachchan küm 40 dak tema Bollywood nung shilem agia aruba mapang Deewar, Zanjeer, Don, Sholay, Namak Halal, Abhimaan, Baghban, Black, Sarkar aser Paa film tem nung kanga takok ngua shilem agi liasü aser itemji ajanga pa kanga nüngtugu aküm.
Arishi küm 72 tain, Bachchan-i cinema nung kanga takok ngua shilem agiba nüngtem nung Padma Shri, Padma Bhushan aser Padma Vibhushan senpet tem agütsüogo.
“Tangbo ni pa den kibong ka kümogo, pa kü ‘paa’ lir. Pa dak aliba sempetji shingaia merakzüktettsü. Abhishek-ia tebui inyakba ama shingaia meinyaktettsü ta teti ashir. Ibaji ajanga pa nem tetsüshi ang tali agutsür,” ta Aishwarya PTI tang ashi.
“Pa taoba mapang, tang aser teti nüngtugusa alitsü. Nüburtem ajaki pa asoshi yamaji bilemer. Anungji pa ajaki nükshir, akümtsübur aser tushir,” ta Aishwarya-i shisem.
Big B ya tan October 11 nü arishi küm 73 ajungtsü. Ajisüaka Aishwarya-i tasoba anogo nung benjung amungtsü mesüra mamungtsü atemabo kecha meshishi.
Bachchan-i taruba mapang ano Bejoy Nambiar-i yangluba Wazir film nung Farhan Akhtar den külemi shilem agitsü sentong lir.
Aishwarya aser Irrfan Khan na külemi shilem agiba, Sanjay Gupta-i yangluba ‘Jazbaa’ film October 9 nü sayatsü asoshi la tang renemshiba mapang ka lir.