Amitabh Nagaland-i ‘Swachh Bharat’ nungitba temaitsü kioktsü bena aru

Mumbai, September 3, 2016 : Maharashtra nung ‘Swachh Bharat Abhiyan’ inyakyim pusema nungitba temaitsü sayua Honibarnü Megastar Amitabh Bachchan-i Mumbai nung kioktsü bena aru.
Osang kar ajanga ashiba agi, Amitabh Bachchan-i anir Mumbai nung aliba JJ Hospital temeküt merükteta among.
“Maharashtra nung ‘Swachh Bharat’ campaign pusemtsüba temaitsü Maha Cleanathon sentong nung nisung aika aden,” ta Deobarnü Big B-i tweet asü.
Amitabh kurta aser pyjama temesüng den waistcoat anüng sentsü ka semer liasü. Pai teka tesa agi jana benden aser kioktsü ka agi lenmanga aok.
Bachchan-i nüburtem dang jana mashi meindoktsü ajungshi.
“Ni teka tesa agi jana bena intokba atema nenoki ni tushir, ajisüaka ibaji kecha balaka masü. Merük meju mapa inyakertemia teti tangbo gloves sepoker meinyaker,” ta Amitabh-i osang channel ka den jembidang ashi.
“Kari lenmang mesüra maopu nung jana intoka ngura idangjisa parnok nokdangang. Parnoki inyakbaji tai ta melenshijang. Asenoki melaki yamaji melenshitsü nungbo nüburtem melenshitsü,” ta pai shisem.