Amitsürtem taküm jenjang tajungba atema asalentong renemogo: Sorkar

New Delhi, July 07 (Agencies): Linük tesem balala nung amitsürtem taküm jenjang tajungba kümdaktsütsü atema asalentong renemogo, ta tanü Centre sorkari Supreme Court nem metetdaktsü.
Sorkar tenüng nung Solicitor General, Ranjit Kumar-i Justice Madan B Lokur aser Justice Deepak Gupta nati akümba Supreme Court bench dang, court-i asüngdangba ama item asalentong renemogo, ta metetdaktsü.
Ajisüaka bench-i, “Nenoki (Centre) jembiba ajak agi, nenoki mapa tajung inyakogo, ta jembir,” ta ashi.
Ibaji jet ta langzüka solicitor general-i, Centre-i tenüngsang maginer, saka supreme court tetuyuba nung inyaker, ta ashi.
Kasa onük ya taruba hopta angadangtsü atema lemteta ayu.
Tamalen Supreme Court-i Centre sorkar dang senden ka mena National Commission for Women (NCW)-i benokba onüktem nung o lemtepa linük nung amitsürtem taküm jenjang tajungba akumtsü atema asalentong renemtsü tuyua liasü.
Supreme Court-i, sorkar aser stakeholders külemi mener senden ka mena onüktem nung bangjemtsüla, aser itemji court-i agizüktsüa akok, ta ashi.
UP kübok Vrindavan yimti nung amitsürtem atema yangluba welfare homes jenjang majungba dak sendakba nung 2007 küm temepishiba ka agüja liasü, aser iba ken o angadangba sülen court-i Centre aser state nem tetuyuba kar agüja liasü.
Amitsürtem taküm jenjang bushidangtsü atema Court tetuyuba nung züngsem teneti akümba luden ka tentet, aser NCW-i Vrindavan nung amitsür 1,000 interview agiba ajanga bushitetba agi, amirtsürtemji pei chirnurtem lir, ajisüaka parnok aikati pei tsüraburtem merepranger.