AMK-i NMA nungi atsünga atar

Kohima, January 31 (TYO): Mongulbar nü Angami Women Organisation (Angamimiapfü Mechü Krotho-AMK)-i Naga Mothers’ Association (NMA) nungi atsüngzükba osang metetdaktsüogo aser iba ya NMA atema tetsükdaktsü tulu ka asütsü.
Tan January 26 nü Kohima nung Joint Action Committee on Women Reservation (JACWR) senden amendang ULBs indang election agitsü sangdongba sülen tensa mejungi akümba aser ano state sorkari ken o meyipa agitsü mepishiba indang onüktem benoka jembiba sülen ken o meyipa agitsü telemtetba agi, ta AMK president Ruokuoheü Miachieo aser secretary Kevingutuo Meyase-i sangdong ka nung metetdaktsü.
Iba telemtetba nung ajemdaker state sorkar aser sendaka alir nem osang agütsü. Ajisüaka, NMA-i shinga dena asüngdangya mesüi Principal High Court, Gauhati nung PIL ka benok aser iba atema onok mepelar, ta AMK mendenpurtemisa metetdaktsü.
“PIL benokba ajanga mangatettep, temulung melemtep aser tensa mejungi akümtsüsa lendong bener arutsü. Iba jagi AMK-i sanen luden züngsemtem den benoker shisadanga olemtepba sülen, tanga osang ka mesangdong tashi NMA nungi atsünga alitsü telemtetba agi” ta AMK sangdong nungsa metetdaktsü.

You must be logged in to post a comment Login