‘Amma’ aser ‘Didi’

India kübok state pongu nung assembly election agiba osang sangdongbanü Assam nung tang mezüng BJP-i Congress madak takok ngua putisütsü otsü ka yanglutetogo aser Kerala nunga Left Front-i Congress madak takok nguogo. Tamil Nadu aser West Bengal na nung AIADMK aser Trinamool Congress nati maneni takok nguogo.  Puducherry nungbo Congress-DMK teloktepi sorkar akumtsü. Item state pongu rongnung sorkar tashii maneni aruba state ji Tamil Nadu aser West Bengal na lir, kong state nüburtemi Chief minister, J Jayalalithaa dang ‘Amma’ (Oja) ta ajar aser West Bengal nung Mamata Banerjee dang ‘Didi’ (Oya) ta ajar. Tan election atema nüboyimba mapang Tamil Nadu nung opposition party temi, Jayalalithaa’er sorkari ajak angati dang lema agütsüba ajanga nüburtem azümesen kümdaktsür aser rongsenkettsüng tashi meitdaktsür ta aija aru, ano külen West Bengal nunga Saradha aser Narada ochimashi ken o nung Mamata Banerjee’er sorkar aija aruaka parnoki takok tulu nguogo. Yimtenren party koba südir süaka ajak nungji ochimashirtema lir, ajisüaka item ajakji toktsür nüburtemi tongtibangsa tongti lenir dak rangloker sorkar shimmer. Iba atema tatishitsü tajung lenirtemji yimtenren nung takoktet tetsür ana- Jayalalithaa aser Mamata na asütsü. Nüburtemi  Jayalalitha dang ‘Oja’ aser Mamata dang ‘Oya’ ta ajatsüsa maongka angubaji atamata masü. Oda ashitsü agi alima nung timtem toushi mapang nung ‘Oja’, ta ajaba kija agia anisüngzük angur, ano ‘Oya’ ta ajaba nunga anisüngzük lir. Tanü election osang sangdongba sülen arishi küm 68, Jayalalithaa-i, “Nüburtem dang pelaba lemsateptsüsa osep nung olong mali, anungji sorkar akumba sülen mapa agi sayutsü aser manifesto nung nangzükba ajak inyaktsü. State nüburtem atema inyaktsü tejangraba dak alaka tanga tejangrababo kecha mali,” ta ashi. Jayalalithaa’er sorkari nüburtem taküm jenjang tajungba akumtsü atema Amma brand kübok sen dalang agi chiyongtsü anguba Amma canteens, Amma tzü, Amma Cement, Amma pharmacy aser Amma metsüjangotsü agütsür, iba den külemi lai tetsürtem atema scheme aika tenzükba den kanga sensak tia kübok alir kibongtem (BPL) nem pangka, laptops aser mixers angati agütsür. Sensakertem taküm jenjang ajungkettsütsüji kanga tongtibang ta angateta Jayalalithaa-i aluyimer nem metsüjang densema aluyimba dak sentakba osettsüsettem nung subsidy agütsüba den külemi scheme aika tenzüktsü, aser item ajak nungjagi tajung chiteta nüburtemi maneni lar sorkar shimba kuli angur. Pei dak mapet ochimashi rongsen  crore 66.65 bendenba ken o nung 2014 küm Bangalore nung aliba court kati Jayalalithaa aija küm pezü tepoukdak ayutsü obendang agütsüdang temelungjang tashitak atua asüba densema nisung 16 tashi soseta asübaji ajanga state nüburtemi la kanga meimba kuli sayur. Amma/Oja, ta ajabaji maongka tulu, aser iba nungji khureta tulu lir, ibaji khuretji abenba yong state nüburtemi la dang Oja ta jaa la noksa nung mamatzü ainer aser apudaka külemer. Ano külen West Bengal nung ‘Oya’ ta ajala Mamata-i Congress aser Left teloktep tamakok ngudaktsüba dang masü saka state nung BJP-i party amenoktsü merangba nokdangtetogo. Tesüiba küm pongu tsüngda Mamata’er sorkari terenlok mapa jenti inyaka nüburtem taküm jenjang tajungba kümogo. Lar sorkari benokba scheme aika rongnung Mamata yimsüsüba mapang National Rural Employment Guarantee Act (NREGA) ajanga yimtsüngtem nung aliba nüburtem aser sensakertem aayangtsü maongka jenti angu. Lar sorkari tesüiba küm pongu nung yimtitem nung masü saka sensakertem aliba yimtsüngtem nung ang sen teimba intok, item kuli ajanga lai maneni yimsüsütsü maongka nguogo. India ya sensakertem teimba aliba linük ka lir, ibayongji sorkari benokba sentongtemji teimbaka aluyimertem, tanü poksüng atema aayangertem aser sensakertem asoshi lir, aser ibaji angateta Jayalalithaa aser Mamata nati atangji nung inyakba ajanga nüburtemi miimbanga meyui mapa tajungji jungkai adoktsüba kuli angur.