Amoklushi nung ango mesüba tetoktepba alitsü

Dimapur, June 28 (TYO) : Chuchuyimpang village council aser Anglers Association of Mokokchung District-i July 1, 2016 nü Amoklushi nung ango mesüba tetoktepba ka alitsü ayongzüker.
Amoklushi ya Chuchuyimpang nung lir aser iba ya Mokokchung district nung awatsüng tulutiba lir.
Ango mesüba tetoktepbaji anepdang 6:00 ako nungi tenzüktsü aser nikongtsütsü 4:00 ako nung tembangtsü. Ango tulutiba apur nem sen 15000 aser tanabuba nem sen 10000 senpet agütsütsü.
Iba tetoktepba atema Entry fee ji sen 500 asütsü aser nisung kati fishing rod 2 amshitsü akok.
Kasa anogo nung Anglers Association of Mokokchung District sayatsü aser Anglers Association of Nagaland (AAN) nungi teshimtet nübotem adentsü.
July 1 nü tetoktepba agiba sülen, taküm August ita tashi hopta shia Hokolbar aser Honibar anogotem ango mesütsü lapoktsütsü. Iba asoshi entry fee ji sen 300 asütsü aser nisung kati fishing rod ana amshitsü akok.
Amoklushi awatsüng nung 1950s nungi tenzüka ango chanu puoka mesür aser Nagaland nung ango mesüba otsü nung ango tulutiba apubaji iba awatsüng nung liasü. Taoba mapang iba awatsüng nung seret 18.5 monster carp ango ka apu.