Amongi aoba sobaliba

Nagaland nung tang yimsüsürtemi sobaliba tamajung ka tentetbaji government tasen akümtsü asoshi Assam len luagi Kaziranga nung amongba ya asütsü. Atangji, Nagaland asoshi tia majung kaji taoba küm pongo shi tsüngda chief minister pezübenbuba melentepba ya asütsü. Iba jagi yimsüsürtema teinyaktsü meinyaktet senzüba angur aser iba jagi nübortem kanga akoksadagi. Atangji, Nagaland nung government junga bener moutet chief minister melenpet melena government tasen kümpet akümbaji tanü tasen masü saka tanü sobaliba tasen ka tentetbaji Nagaland government akümtsü asoshi Assam leni aluba ya asütsü. Ibaji asenok ajak asoshi taaktsü mapa ka lir. Ashiko, Nagaland nung pei kidang lia government memelentetbaji kati ka dak temulung melemtetba agi asütsüa akok mesüra tangari mesüzüka aotsü mesüra pur aotsü tsübuba agi asütsüa akok. Ajisüaka, kechi kuli agi südir süang pei lima toktsür tangar lima nung oagi monga pei yimten yimli latettsübaji tim masü. Iba ama sobaliba aser inyakyim jagi tangar tsüngdang asenok anülar aser asenoksasa asenok azüyar. Atangji, Naga nunger Kazirangai orr amongba atema tai mali, khenkhenbo oagi anisüngzüka pelatepa  amongtsüla. Takoker atemabo Kaziranga amaji kazüa amongdak lir. Ajisüaka, pei lima toktsür yimsüsürtem luagi government akümtsü atema nübo aser rongsen endoka kazütsübaji nüngdak madoker. Ibayongji, asenoki bilemdangtsü atema taoba hopta nung, ” Kaziranga nung Nagaland House ka yanglua ayu nunga koma süla ?” ta asüba tasüngdangba nung telangzüba bushiogo. Iba tasüngdangba nükjidongji Kaziranga nung Nagaland House yanglunerba masü saka Kaziranga nung Naga nunger yimsüsürtem luagi amongba indang asenok rongnung shisalemsatepner. Aji oda, telangzürtem aikati yimsüsürtem Kaziranga nung amongba anema mepela o metetdaktsüogo. Ano, katibo Kaziranga-ji Nagaland House masü na (?) ta tashi tasüngdangba agi dang langzüogo. Yangji tangatettsü lir, kechiyong tang tashi nung Naga nunger yimsüsürtem mapang mapang shia longsulongsua lua Kaziranga nung amongba jagi Kaziranga-ji Nagaland House amato kümdaktsüogo. Ano, telangzür katibo, tangarbo ita nung ki asütsü ayongteperako, saka asen Naga nunger yimsüsürtemibo Kaziranga tashi dang tongtetji to, ta langzübaji lanurtem asoshi temulung ayangtsüka lir. Nagaland nungbo gari lenmang majungba kija agi nübortem (public)-bo nümamedangtet senzür saka yimsüsürtembo Kaziranga nungi atu shia gari-ang tajungba aser tasenba melener. Aji oda, Kazirangi ken luli, lenmang tamajungba kümli, Kazirangi ken luli Nagaland sentsü teimba kümli ta Nagaland nung yimsüsürtemi pei lima aser nübortem memeimi taochi maka inyaker. Joko, Nagaland nung aliba nübortem meimra, yimten nung kechi atalokdir atalokang, Kazirang-ibosa malutsüla. Nagaland nung yimsüsürtem ajak Kazirang nung lir ta television nung osang yokdang aser osangkakettem nung adokdang nübortem nümamedangtetter. Ibai putu tasen, anungji putu tasen sobalibajibo lanurtem ajak arakzüa mapa inyakdaktsüba ajanga pei lima anüng tashi tuagi renlokba putu asütsüla. Aji oda, chief minister melendang, pei lima toktsür moi, pei lima nung pei nübortem den yimten onük jembia amongtsüla. Joko, Nagaland yimten nung yimsüsürtemi Nagaland tangar menepa tejakleni anir aotsü bilemtsü mapang tongogo. Aji oda, tangbo Nagaland nung yimsüsüba ajanga ni kechi tajangzük angur ta masü saka nia Nagaland nung alirtem asoshi kechi tajangzük agütsür ta bilemtsüba mapang lir. Asenbo, Nagaland tenüng nung tajung aser tajangzük ajak agitsü saka Nagaland atemabo kecha tajung  meinyaktsütsü ta süra asenokji Nagaland nung senso tajung ka masü. Tanü Nagaland kanga mejungi raksaa aliba yanglutsü asoshi Kaziranga nung masü saka Nagaland nung lishitsüng nung nokdaker jembitsüla, auyi pongloka inyaktsüla aser pei ajangzüktsü atema masü Nagaland ajangzüktsüsa inyaktsüla.