Amongnü Hornbill benjong

Hornbill benjongmong nung ya tamonger kabo kanga pelatepa mongdar asütsü aser asen nisunga aika senotsü nunga tajangzük ngudar asütsü imlar. Ajisüaka, benjong among dang asenoki Tsüngrem amadoker sentepia mao yartsüngsanga pelateptsü aser shishilembatepa dang amongtsü shimtetra, alemli Israel nungertemi Yihova Tsüngrem amadoker nashi chanu süngyanglu külema tsüngsangtepba den kasa asütsü. Tanü asenok Nagaland nung alir Naga nunger jakla yimya aser tangatetba ya reprangdangra, Israel nungertemibo nashi chanu dang külem saka tanü asenok Naga nungertemibo sen dang ngura nashi teinteta kecha nungnanga melii mulungsua külemtsü südi. Atangji, meimchir loktiliba nung benjong amongbaji Tsüngremi tentettsüba sobaliba ka lir, anungji mapang mapang shia pelatepa benjong amongtsübaji tim dang lir. Ajisüaka, amongnüa memongi benjong amongtsü ayongzükra asenok tamangba jenjangji mali küma amonger asütsü. Kasa India nung asenok den külemi alir Hindu aser Muslim nungertemi parnok tamangba yimsü metsünga reta amangba jenjang den asenok Khristan purtemi Yisu dak amangba tamang jenjang reprangdangra asenokbo tiyazü amanger. Asenoki anepdang Tsüngrem külemba nung minute ponga meindoker aser hopta nung aser ita nung ta masü saka taküm nung Tsüngrem külema lumiba anogo kenüa malitsü. Karibo amongnü sentepi maor aser sentepi aortema teimbaka tejak sayutsü mesüra fashion sayutsü asoshi aoer amai aoer. Tangar Hindu nungerbo anepdang sakli tzü chigur tamasa teronem menemtsü ronga par tsüngrem tama külemmatsü aserang hopta nung mesüra ita nung kenübo lumia amongtsü. Parnok lumia amongbaji kecha meinyaki amongtsüba masü saka chiyongtsü kecha machi lumiaka akhi mapabo inyaka amongtsü. Ano külen, Muslim nugertemi ita piyong anüngdang kecha mechii mapa inyaka lumiba tamang aser tangatetba denbo asenok amongnüa memongi benjong amongba ya medemdangteptsüla masü. Atangji, mezüngbo Hornbill benjong sentong tenzükdang sarasadema mesüi tenzük saka tangbo sarasadembo asür. Ajisüaka, taküm küm amai benjong sentongbo sarasademer tenzük saka amongnü memesük kar yartsüngsanga pelateper aser kar shishilembar ta süra, iba jagi asenoki Tsüngrem mezüngmeshiba mapa ka dang kümadoktsü. Asenok shitakba Khristan yimsü amangba purtem süra, kechisüdirsüaka Hornbill benjong ya December ka nüsa tenzüktsü ta temzüng ozünga ka ali masüji, amongnüji ayaoktsür, tentonü (hombar) nü nungi tenzüktsüba asü. Iba jagi ashiko, Nagaland anghi anir tangar yimsü amangertemi asenok tamangba jenjang ngur taliang akümtsübula. Atangji, tangari ola madokaka, ABAM-ibo nüngsen agia Hornbill benjong ya amongnü mamongtsüla ta Nagaland angh nem takangba shidi ka agütsüogo. Ajisüaka, Nagaland state nung Chief ministeri anir government shitak lia, Nagaland nung amongnü benjong mamongtsü atema angh dangi zülubaji asenoki inyaktsüba mapa ka tangar dang ashir amai asütsü. Ano, tebilemdangtsü kaji, Nagaland government nung yimsüsürtem ajak Khristan aser Nagaland angh-bo Hindu nunger, anungji Khristan purtemi amongnü benjong amongtsü lemtetbaji melenshijang ta Hindu nunger ka dang ashibaji, paia kechi komaka bilemer asütsü ? Amanga-amanga asenok iba tashi ya amangtetter ! Joko, Hornbill benjong alidak yabo Laishiba angati alemtsü asoshia state government-i temelaba sadema magütsütet kümogo. Nagaland nung yimsüsürtemi anir arogo nunger ajak Tsüngrem nungi pilabaji yamai dang pilatettsü. Kisama nung amongnü Tsüngrema mali ama mongtepertemji arogo nungertem lir. Parnokji Tsüngremer santem lir. Item san mesütsü purtema shinga mali amai Nagaland nung amangba purtem aika sen aser yimten tashi agi tsüngrem kümdakja külemertem küma omadagi. Naga nunger nüchi mesüka taküm alitsüba ya amtsüka masü aser senotsüa masü saka Tsüngrem o aser Pa temeshiba yimli asütsü.