Ampareen-i Assembly nung Khasi oshi agi jembi

Shillong, Metsüremir 19 (Agencies): Budget Session tanabuba anogo nung Anghi Hindi agi jembiba dak sendakba nung o lemtepndang Tentonü Meghalaya Legislative Assembly nung züngsemtemi otsü tasen ka yanglua local oshi agi jembia liasü.
Taoba mapang nung iba amala ya khen danga ataloka mali, kechiyong temzüng ajanga Meghalaya Legislative Assembly nung English amshitsü ta jangja jangja latetja lir.
MLA tem rongnung Khasi oshi agi jembirtem rongnung mezüngbubaji taoba minister aser East Shillong nungi Congress MLA, Ampareen Lyngdoh liasü.
Anghi Hindi agi house address asüba dak sendakba nung o lemtepba mapang nung Ampareen-i ashiba agi, Meghalaya Legislative Assembly, Rules of Procedure and Conduct of Business Rule 28 nung “Assembly nung ken o ajak English nung agitsü,” ta jangja jangja latetja lir.
“Asenoki iba onük ya tanü agintsü akok kechiyong Metsüremi (March) 16 nü iba ya latetatokogo,” ta Congress MLA-i Angh Ganga Prasad-i iba session mezüngbuba anogo nung Governor Address Hindi agi agütsüba indang indanga mesüi ateshia ashi.
Ampareen tsüngsü nung anidaka North Shillong KHNAM MLA Adelbert Lyngdoh-ia Khasi oshi nung, Anghi House nung Hindi agi jembiba ya mim onük ka lir, ta ashi.
Kasa mapang nung MLA temi Khasi oshi nung jembiba aija Gambegre nungi NCP MLA Saleng A Sangma-i, tashi kar ajanga state nung tongtibang kin asem ya lemdangtsütsü meranger amai reprangteter, ta ashi.
Paisa state nung kin asem lemdangtsütsü asoshi merangba ya kondang magizüktsü, ta ashi. Kasa mapang nung Angh pusema pai ashiba agi, Anghi English junga mejembitetba agi Hindi nung jembi.
Paisa MLA temi ajaki angatetba oshi nung jembitsüla, ta ashi.
Kasaji Mawkyrwat nungi HSPDP MLA, Renikton L Tongkhar-i MLA temi ajaki angatetba oshi nung jembitsü merangtsüla ta ashi.
“MLA temi pei oshi nung jembitsüba ya nibo magizüker. MLA temi English nung jembitsü merangtsüla,” ta pai ashi.
Iba sülen mapang tatsüka lir osangbenertem den jembidang Assembly Speaker Dr Donkupar Roy-i ashiba agi, Assembly nung züngsemtemi House nung shilem agidang English agi jembitsü merangtsüla.
“Onoki Englishi junga mejembitetba MLA tem nem local oshi nung jembitsü asoshi maongka agütsütettsü,” ta Dr Roy-i ashi.