Amritsar nem ‘Holy City’ nüngja agütsütsü: Kejriwal

Chandigarh, September 09 (Agencies): Hokolbarnü Delhi Chief Minister, Arvind Kejriwal-i, par party-i Punjab assembly election nung takok ngura parnoki Amritsar ji temeshi yimti ta sangdongtsü aser Golden Temple temeket nung yi o shi nokdangtsü, ta nangzükogo.
Kejriwal-i anogo pongunü atema Punjab semdanga lir aser paisa, Aam Aadmi Party-i Punjab election nung takok ngura Amritsar ward city aser Anandpur Sahib ji temeshi tesemtem ta sangdongtsü, ta metetdaktsü.
Tanep Jalandhar-Amritsar road nung PAP chowk anasa Kejriwal mena aliba SUV garii temeiner gari ka dak tsükoktsü, ajisüaka pa meyiru.
Kejriwal-i state semdangba sülen tanabuba anogo nung pa Amritsar-i aodang pa Innova gari tejaklen mena liasü, aser iba gari jagi tejaklen escort gari dak atsük, ta police-i ashi. Gari nungji Kejriwal den AAP lenirtem- Bhagwant Mann aser Gurpreet Ghuggi nata mena liasü.
Tang AAP tongti lenir, Kejriwal-i Party election nüboyim nung shilem tagitak lir. Punjab assembly election sangküm January mesüra February ita nung agitsü.