Amritsar nung arishi küm 70 tantsür kati tanur aso

Amritsar, May 11 (Agencies): India tsür kati arishi küm 70 nung tang mezüng tanur asoba sülen lai, tang mezüng tetsü ka akümtsüsa la kanga tain masü, aser tangbo la taküm abensa-a kümogo, ta ashi.
Tesüiba küm ana tashi Daljinder Kaur aser la kinungbu Mohinder Singh Gill (79) nati Haryana nung aliba fertility clinic ka nung In Vitro Fertilization (IVF) treatment agia aruba sülen taoba ita tanur aso.
Kaur-i ashiba agi, kinungbu tena kibong kümer küm 46 lia arudang tanur angutsü teimla makai aküm, aser ibaji ajanga tangari asayamenutsü, kechiyong iba linük nung tanur masobaji tsüngrem nungi atakatem ka ama züngshir.
“Tsüngremi ozü sarasadem angashi. Tangbo kü taküm abensa-a kümer ama bilemer. Ni küsasa tanurji repranger, ni tashi kanga iter ama bilemer. Kü kinungbui ni kanga anepalur aser pai akokba tashi agi yariteper,” ta Kaur-i Amritsar nung osangbenertem dang ashi.
“Künati advertisement (IVF) angudang, ni tanur kanga aginer, anungji merangdangdi ta bilem,” ta lai ashi.
Kaur-i la arishi küm 70 lir ta ashi, ajisüaka clinic statement ka nungbo la arishi küm 72 tain ta shia lir.
“Tanurji tena indang entzü aser kotzü ajanga yanglu aser April 19 tanur tasodang seret 2 dang liasü,” ta National Fertility and Test Tube centre-i ashi.
Kaur kinungbuji Amritsar tezülen farm ka lir aser pai-a, Tsüngremi iba Armaan reprangtsü ta ashi.
“Küna asüba sülen tanurji koba tia-i aitsü ta tangari jembir, ajisüaka ni Tsüngrem dak tamang akar. Tsüngremji ajak takoksang aser ajak nung lir, pai ajak peritsütsü,” ta paisa ashi.
Kaur dak atalokba ya India nung tang mezüng masü, kechiyong 2008 küm nunga Uttar Pradesh nungi arishi küm 72 tantsür kati IVF ajanga jakrep aso.