Amungnü nungi tenzüka tzü telung nung Emiliano Sala bushitsü

Guernsey, Aenjeti/Jan. 29 (Agencies): Samar aliba football asayar, Emiliano Sala’er kinungertemi pa indang tayimtsü bushitsü asoshi rong teraksa bushir ka hire süa alisangi tzü telung nung Amungnü nungi tenzüka bushitsü ta ashi.
Bluewater Recoveries nungi David Mearns-i Tentonü ashiba agi, Guernsey asetkong müketa aliba tzüyim nung ango apudang amshiba rong anati bushia liasü.
Cardiff City nungi striker Sala aser pilot Dave Ibbotson na mener Aenjeti/January 21 nü samaba tayimtsü bushiba ya Guernsey police temi Yangtepnü tembanga liasü.
Saka Sala maneni bushitsü atema Argentina nunger football asayar mongin, Lionel Messi aser linük Tir Mauricio Macri nati anir ajungshia liasü.
Arishi küm 59 tain Ibbotson aser arishi küm 28 tain Sala, shiba ita tetenzüklen French club Nantes nungi Cardiff-i arua liasü, tena bushitsü atema senotsü bendenba page ka nem sen agütsür 4,500 dak tali rongnung Messi densema lir, kong sen $343,000 dak tali bendena liasü.
“Maneni bushitsü atema sen bendentetogo,” ta Mearns-i Guernsey airport nung osangbener dang ashi.
Amungnü nungi tenzüka tzüyim telunglen bushitsü asoshi survey vessel ka sonar aser remote ajanga amshiba gol ka southern England nung aliba Southampton rongnendak renema lir, ta paisa ashi.
Parnoki tayimtsü radar nungi samapa tesem anasa tasazük 25 square nautical miles nung bushitsü.
Iba tesem nung tzü tarok ya meter 65 (feet 2015) tashi lir aser taroktiba agi meter 110 alitsü, ta pai ashi.
“Tebilemtsü tulutibaji tzüngsang mopung ya lir. Onoki tayimtsü ya ngutettsü ta meshitettsü saka kinungertemi aginüba ama nguteta mali,” ta Mearns-i ashi.
Sala tetsü aser teyi taoba hopta Britain-i aru, tena Tentonü tayimtsü samaba tesem anasa tayimtsü nung mener semdanga liasü.