Amy Jackson-i Punjab oshi nung ken atentsü:Manj Musik

New Delhi, August 29, 2016 : Actress Amy Jackson-i “Lak hilaade” ken Punjab oshi nung atentsü, ta ken mejemer aser kentener Manj Musik-i ashi.
Arishi küm 24 tain, Jackson-i tesüiba mapang pop telok RDB nung dena alisang atema ken ka nung rap asütsü ta olulu jembia liasü, ajisüaka Manj-i Amy nem rap masü saka ken shitakba tendaktsüner, ta ashi.
“Amy-i rap masütsü saka ken shitakba atentsü. Lai-a rap ang sünüa liasü saka laji ken aten tajungba asütsü amai ni bilemer. La ken atentsüji tan mezü lir aser ano ajia Punjab oshi nunga ang atentsü, ajisüaka lai iba ken rangben ita ka tsüngda nung kokogo. Iba ken tenüng ‘Lak hilaade’ tetetzüji, nü teberem arakzüang aser nü dak tsüngsangtsü sempet aliba temai adokdakjang,” ta Manj-i Canada nungi e-mail ajanga IANS dang ashi.
“Arishi küm 31 tain, Manj-i tamalen “Singh is Bliing” film atema “Singh & Kaur” aser “Maahi aaja” kentem mejemja lir. Iba film nung Amy aser Akshay Kumar nati tongti shilem agia lir.
Nüngtugu “Desi Hip Hop” kentensang, Manj-i, tetsür actress den külemi music video yanglubaji tan ya ni atema mezüng asütsü, ta ashi.
“Mezüngbo ni kanga arendaka bilem kechiyong  ‘Singh is Bliing’ film tangokba mapang Amy ola kanga majung liasü, ajisüaka studio nung khen tatsüka mapang intokba sülen tangbo junga kümogo,” ta pai ashi.