An Tetsüti (Yerimia 7:1-6)

“O Yirusalem, Yirusalem, ainkartem tepsetba aser Pa dangi yokertem lung agi onsetba! An tetsütii pei techanu tashikang kübok anitener amokbangba ama, ni kwiben ne chirtem külemi anitennü, saka nenoki memelung.” (Mt. 23:37).
Yisui Pai sayutsüngiba iba aiatai agi tembang. Pai Tsüngremi aremzükba noksa an tetsüti aser techanu noksa amshia rasaa ashi. Tsüngrem kodanga ilunga mali. Pai nübur den taochi taremzük agi inyaker. Pa dang Taremzük Tsüngrem ta ajar (Rom 15:5). Asenok rongnung kati ka dang inyakba ama Tsüngremi inyak asübo asenok shinga taküm alitsü makoktsü. Aser Tsüngrem taochiji agütsüogo ta amanga asenoki kasa tamang nung aotsü makok. Yihuda nungeri Tsüngremer taremzükji mangatetti liasü. Tenyar Paul-i parnok nem tesashi tekümdangtsü agütsü, “Mesüra Tsüngrem tajungba tazükba aser taremzükba agi na temulung meyiptsü leni aniba rongsenji na mezüngmeshir no?” (Rom 2:4).
Yirusalem dang “tabensa tebur tajung” aser “alima ajunga tepela” ta aja (Aiatai 2:15b). Saka la teti la tsükchirtem liasü. La jenokdakji Yihovah tashikang kübok liasü (T.Ken 17:8; 36:7). Pa den lungjemba agi la azükarua liasü. Tsüngremer osang bener arur ainkartem aser shisa taka nisung tem la dangi arur lai ibaji mezüngmeshi asü. Lai la asoshi tiyazü ainkartem aser tesayurtem aniten. Lai kechi nüngdak iba indang sayutsüngir lai maginü. Lai ibaji angatsü mulunga mali asü. Lai Tsüngrem nungi ochi osang abenertemji tagizük dang magizük masü saka lai parnok tetepsüta tepset. Parnoki ka ken ka ken ta A-Z (Abel nungi Zekaria) tashi tepsetba agi Yirusalem nung alirtem nem Yisui tesashi tekümdangtsü agütsü (Mt. 23:35).
An tetsüti-i mongzü talang nungi angudang techanutem jatener. Tetsü tashikang kübok jenokertem kümzüker. Tetsü tashikang kübok jenoka malirtem melamela bener aor. Tsüngrem Tanelai ola tanük agi jembiba ola angabaji asenok tekümzükdak tajungtibaji lir. Kodang asenoki Tsüngrem den jajatsü asoshi bendanga agütsüdir Pai asen lemang ajak nung anitsü. Asenoki aibilen masütsü (Isa. 30:21). Asen taküm nung Satan sentong raksatsütsübaji asen mulungjang Tsüngrem den alibaji lir (Rom 16:19,20). Asen mulung merangba jagi teraksa dangi anitsü (A.S. 29:1). Aibilenji moshia maküm tashi Tsüngremi azüzüka atar! (Lipok 15:16). Asenoki aji aibilena mangatetli.
Yisu dak mereprangba agi ni nemzüa aor; Kü tenük Pa dak lir, aser Pai kü dang lemang sayur; Pai ni anidang lemangji tammang ama asütsü, Saka Yisu sülen anidak tashi ni tai lenmangi aotsü makok! (Darby).