ANAHTA-i DOSE nem anogo 7 züngzüktsür

Mokokchung, July 8 (TYO): All Nagaland Aggrieved Hindi Teacher Association (ANAHTA)-i Aggrieved Hindi tesayurtem nem ita pungu (W.E.F Feb 2016 – June 2016) itasen anogo tenet nü tsüngda agüjang, ta takhangba ka agütsüogo.
Mapang shia ANAHTA-i par taginüba aser nüngdaktem shiaka, DOSE (Directorate of School Education)-i tenarong matener, joko tesayurtemji meshitetba timtem aikati tongogo, ibyongji longkak aittsüsa akümer, ta ANAHTA tongti zülur, Sentimenla-i metetdaktsü.
Hindi tesayur itasen aser arrears magütsüba kuliji central government-i fund mechiokba ajanga magütsür ta dang langzür. Aji saka, central nungi sen yokaka mapang shitak nung itasen magütsüba ngua arudagi, ta parnokisa metetdaktsü.
Anungji, Feb. 2016 nungi June 2016 itasenji anogo tenet nü tsüngda (July 8 nungi tenzüka) agüjang ta takhangba ka agütsüogo, ta kasa osang nungsa shisema liasü.
ACAUT, NSF, Union, NGOs, temulunger aser iba timtem agi kongshia alir tsürabur aser kibongtem ajaki iba dak sentakba maparen asoshi nungitdaktsüner, ta ANAHTA-isa ayongzüka metetdaktsü.