Anakara bomb lendong nung 86 shi pokset; 186 shi yiru

Police forensic ketdangsertemi Ankara nung bomb lendong ana tashi tanep Honibar anepdang atalokdakba sülen lendong atalokdak noksa agia bushisüngdangba noksa nung angur. (Ankara, October 10)

Ankara, October 10 (Agencies): Turkey kübok Ankara yimti nung tentetba tongti train station nung bomb lendong ana tashi tanep, Honibar anepdang atalokba osang jangjaogo ta police-i tanü metetdaktsü.
Kurd kin pusemertemi yimjung lokti senden ka ayonga agitsü ghonda ishika jakdang atalokba bomb lendong nung ishiba agi nisung 86 poksetba aser nisung 186 dak tema yiruba osang tang tashi nung jangjaogo ta parnoki ashi.
Turkey nung tentetba lokti tentet balalai külemi lungjemer agitsü ayongba lokti senden nung shilem agirtem pokseta südaktsütsü nükjidong nung Ankara yimti kübok Ulus district nung tentetba train station nung tanü lendongji atalokdaktsüba osang jangjaogo.
Peisasa pokseta asütsü mulungtetertemi pei temang nung alenokba bomb pokdaktsü asü mesüra train station nung bomb yutsür kasaji pokdakja tanep lendongji atalokdaktsü’ar iba osang jangjashitsü asoshi police ketdangsertemi bushisüngdang tenzüka lir.
Tanep lendong atalokba sülen Turkey Ato Kilonser, Ahmet Devutoglu-i par interior aser health minister na den ajurutepa tensa azüoktsü onük jembiba osanga jangjaogo.
Tanü lendong atalokdaktsüba asoshi telok shingaia tang tashi nung tenüng agia metetdakja mali saka Kurd kin pusemertemisa taküm July ita ayongba lokti senden nunga tan amala lendong atalokdakja nisung 30 dak tema tepsetba yong tanep lendongjia Syria aser Iraq na nung lendong kanga sashia atalokdaktsüba Islamic State (IS) kiralongrar telok mapa asütsü akok ta ketdangsertemi temulung malemba olen ka metetdaktsüogo.
Turkey-i par general election sentong taruba November ita 1 nü agiba jakdang sorkar den rarabaren anena yimjung tezüngzüktep agitsü asoshi Turkey sorkar anemba Kurdistan Worker’s Party (PKK) teloki sentong renema lir aser ibaji sentongji raksatsütsü nükjidong nung tanep lendongji atalokdaktsü südi ta ketdangsertemisa metetdaktsü.
“Sorkar aser PKK telok na tsüngda yimjung tezüngzüktep agitsü asoshi renemba sentong raksatsütsü nükjidong nung kiralongrartemi tanü lendongji atalokdaktsü,” ta tongti Kurdish Peace & Democracy Party (HDP) yimtenren telok lenisang, Selahattin Demirtas-ia metetdaktsü.