Ananth Kumar asüku nung Northeast lennir temi mangyim lemsatep

Guwahati, Yimpoksüi/November 12 (Agencies): Parliamentary Affairs Minister, Ananth Kumar meimlai lia Yimpoksüi/November 12, 2018, Tentonü alima nungi pilaa ogo. India ajak nung lennirtem den külemi Union Minister of State, Kiren Rijiju-i asüku lemsatepogo.
Tentonü anepbongi Bengaluru kübok nija mozüki ka nung Kumar süa liasü.
1996 küm nungi Lok Sabha nung Bengaluru South constituency nungi Kumar-i shilem agi aser term trok tashi atonga pai takok ngua liasü. Kumar arishi küm 59buba nung asü.
‘Külemi inyaker senior ka aser BJP lennir tain Ananth Kumar Ji asüba osang angazüka ni kanga dang aoksar. Jakla den lennir tajung ka ama pai ochishia lokti tenzükogo. Pai kü dang sayubentsüba aser shisa olen ashibatem teti kü mulung nung yua amshitsü. Pa tanela nem anisüngzük agüjangma,” ta Twitter ajanga Rijiju-i lemsatep.
‘Union Minister Ananth Kumar ji asüba angazüka temulung taroktiba nungi jashir. Nüburtem atema pai maparen ajak nung yakyaka tashi agi aser bendanga agüja inyakba maparentem teti dang tatishitsü tajung alitsü. Kümar’er kinünger, medemer aser temulunger ajak dang iba tejashiba lemsateper,’ ta Twitter ajanga Assam Chief Minister Sarbananda Sonowal-i lemsatep.
‘Ananth Kumar ji akümli nung asenok den joko mali aser iba atema kanga jashir. @BJP4India nung bendanga agütsüba aser cabinet minister tain ka liasü. Iba asüku mangyim jashi mapang ka nung par kibong atema ni sarasademtsür,’ ta Twitter ajanga Manipur Chief Minister, N Biren Singh-i lemsatep.
‘Asemben tashi Union Minister inyaksang, #AnanthKumar asüba osang angazüka kanga jashir. Pa asangwa mapang nungi lokti tenzük aser linük yimtenren nung ajemoka nübur tenzükogo. Pa asüba ya Karnataka aser India atema takoksa tulu. Pa tanela nem anisüngzük agüjangma,’ ta Twitter ajanga Nagaland Chief Minister Nephiu Rio-ia lemsatep.
Tesüiba küm nung Kumar-i Tourism and Civil Aviation Minister ka ama inyakogo. Pai kinungtsü Tejaswini aser jala ana toktsür ogo.