Ananya-i Universal Music den kententsü tezüngzüktep agir

Ananya NandaMumbai, September 10 (Agencies): Indian Idol Junior 2 kenten tetoktepba sentong nung takok angula, Ananya Nanda-i Universal Music India (UMI) telok den tongti tezüngzüktep ka agiogo.

Tan tezüngzüktep agiba sülen, Odisha tsürla, Ananya-i mejema atenba single ken taruba küm 2 tashi kümshi adoktsütsü tenangzükba UMI teloki agiogo.

UMI teloki par taruba indi-pop sentong nung shilem agidaktsütsü asoshi Indian Idol sentong final nung shilem agitsü jenjang angur 4 – Vaishnav Girish, Nahid Afrin, Nithyashree Venkataramanan aser Moti Khan nunger dena tezüngzüktep agiba osang jangjaogo.

Par pezü nema singles ken ka ka adoktsü maongka agütsüba den külemi, parnoki taruba küm 2 tashi agiba kententsü shilem ajunga ketdangsüa acha ayangtsü asoshi UMI-i nangzüka lir.

“Tan shimtetba Indian Idol Junior final nung shilem agirtem ajunga dak kententsü sempet tajung aketba ngua parnok nem tajangzük bener arutsüba den külemi, parnok jenjang tajungba kümdaktsütsü nükjidong nung ozü teloki parnok den tongti tezüngzüktep kar agiogo,” ta R H Chhatrapati, Vice President, Universal Music & EMI, South Asia-ia metetdaktsüogo.

You must be logged in to post a comment Login