Ananya Sritam Nanda ‘Indian Idol Junior 2’ kümogo

‘Indian Idol Junior 2’ September 6, 2015 aonung benjung tulu lia tembangogo. Odisha nungi arishi küm 14, Ananya Sritam Nanda-i iba tetoktepba nung takok ngur külen la senpet amer tangokba noksa yangi angur. La nem senpet agütsürtemji Hollywood actress, Sonakshi Sinha, ken mejemer mongin Vishal Dadlani aser actor Kapil Sharma nunger liasü.

September 07, 2015: Hopta 15 tashi mazüngi toktepa arur külen, Bhubaneshwar nungi Ananya Sritam Nanda-i Deobar aonung ‘Indian Idol Junior 2’ takok nguogo.

Semi-final nung Vaishnav Girish tugoba sülen final nung la Nityashree Venkataramanan aser Nahid Afrin na den toktepa liasü.

Arishi küm 14, Ananya ya 2014 kümbo mezüng round nung tugoa liasü saka takümbo lai takok marok den TV channel atema sen lakh 10 indang contract ka ngutetogo. Scientist kümnüla, Ananya-ia kanga bendanga agüja aser temulung ajak agi shilem agiba ngua nüburtem aser tetendangertem mulungjang nung kongshia liasü. Tetsübo kecha mapa nunga mali saka tebu ya sorkar tenzüker ka lir.

Ananya-i kentener rongnung tesabubaji, Shreya Ghoshal aser Arijit Singh na lir. Lai harmonium-a temner aser iba tetoktepba temer külen lai, “Ibai kü taküm nung mapang tajungtiba lir. Ni kechi anga mashir! Indian Idol Junior nung shilem agiba ajanga ni aika angazükogo aser ibaji atema tenüngsang agütsür. Ni anguba marok ya iba tetoktepba nung shilem agir ajak angutsü dalang, ta nibo bilemer. Sony Entertainment Television repranger ajak dang kanga pelaba metetdaktsür kechiba süra nenoki temeim agi onok teti nungitogo. Ni iba sabang nung Sonakshi ma’am, Vishal aser Salim sir nunger kangasa menungratsü,” ta ashi.

Iba sentong tatembang aonung tetendangertemi shilem tajung agia liasü. Ken mejemer Vishal Dadlani-i pai mejemba ken tajungtem rongnung kar aten aser Sonakshi Sinha-i Sari Ke Fall Sa, Rani Tu Main Raja, Tamanchey Pe Disco, Sawaar Loon, Party All Night aser Har Kisiko Nahi Milta kentem nung tsüngsang. Sentong nung Sonakshi tebu, actor/politician, Shatrughan Sinha meimlai arua tanurtem den jembiba mapang la-a kanga aoksaa liasü. TV nung shilem agia aliba film actor akümsang, Kapil Sharma-a pa shilem agiba film ‘Kis Kisko Pyaar Karoon’ ajungkettsü asoshi iba sentong nung arua dena liasü.

Sentong nung Nahid aser Nithyashree na nem runners-up senpet agütsüba sülen Nahid-i, “Ni IAS kümer linük asoshi langka tajung ka danga inyakner. Ni iba tetoktepba nung iba jenjang tashi atutsü ta meyimla,” ta Hindustan Times den jembidang ashi. Laisa, “Ni Vishal sir kanga meimer, pai onok shilem agir külen o ashibatem kanga junga ashir aser ibaji ajanga onok tali ajungmesor,” ta shisem.