ANATG-15 batch tesayur nem scale pay agütsütsü

Kohima, Mongputeni (October) 3 (TYO): Nagaland Cabinet-i Bodbarnü All Nagaland Adhoc Teachers Group (ANATG)-2015 Batch nungi tesayur 1166 nem okadak ken o benoka aliba metembang tashi scale pay agütsütsü telemtetba agiogo.
Tanü Kohima nung Cabinet Meeting nung iba telemtetba agi, ta School Education Advisor, K T Sukhalu-i ashi.
Taoba mapang School Education Department-i kasa tebilembaji shidang saka Finance Department-i magizük. Ajisüaka, State Cabinet-i kanga junga olemtepba sülen okadak service regularization indang onük atema oshidang magütsü tashi scale pay agüja atatsü lemtet, ta K T Sukhalu-i metetdaktsü.
“Parnok sanctioned post nung shimba lir aser sorkar o department-i service regularize asütsü atema bilemtsür, saka okadak ken o benoka aliba ajanga mapang atsülanger. Cabinet nung jembiba onüktem sangdongba sülen adhoc tesayurtem nem scale pay indang osang metetdaktsütsü” ta paisa shisem.
ANATG-2015 batch-i tanü cabinet telemtetba agizüktsü aser mapa tenzüktsü imlar, kechiyong September 26 nü Secretariat Conference Hall nung senden amendang parnoki iba kasa takhangba agütsü, ta Advisor-isa metetdaktsü.
Cabinet-i lemtetba osangji All Nagaland School Teachers Association ajanga angazükogo aser iba atema Department dang pelar, ta ANATG-2015 Batch otongdar Bendang Ozukum-i ashi.
Cabinet-i lemtetbaji onok ket nung tezüluba nung magütsü aser asüng ANATG-2015 batch lokti senden ka amenba sülen ang onoki telemtetba ka agitsü, ta paisa ashi.