ANATG-i Advisor School Education den ajuruteptsü

Kohima, Chiteni (July) 2 (TYO): All Nagaland Adhoc Teachers Group (ANATG) 2015 batch-i anogo anabuba lungkak aitba sentong magii thinenogo.
Aami (June) 18 nungi ANATG-2015 batch-i Directorate of School Education kima nung adhoc tesayur 1166 regularize süjang ta takhangba agüja lungkak ait.
Parnoki Luchii (December) 2012 tashi nung shimba tesayurtem regularize asütsü atema akhanger saka state sorkari telangzüba tajung magütsüba atema Aami (June) 29 nungi lumia lungkak aittsü tenzük.
Ajisüaka, Honibarnü All Nagaland School Teachers Association (ANSTA)-i okadak Interlocutory Application ka benoktsü nangzükba nung ajemdaker ANATG-2015-i iba aonung nungi lungkak aitba anena atatsü telemtetba agia liasü.
ANATG ketdangpurtemi ANSTA aser NSF o ENSF den senden mena telemtetba tajung ka magi tashi lungkak aitba anena atatsü ta parnok atema otongdar Bendang Ozukum-i ashi.
Lungkak aitba adhoc tesayurtem atema Interlocutory Application ji tatembang masü saka service regularize asütsüla, ta yashi Bendang-i shia liasü.
Tanü ANSTA den senden ka amentsüba sentong liasü saka ibaji matalok. Ajisüaka, asüngnep 11:00 ako nung ANATG-2015 batch ketdangpurtemi School Education Advisor, K T Sukhalu den ajuruteptsü ta paisa shisem.