ANATIA KOMA BILEMER

(Facebook nung Ao confession Zone teloki ayongzükba first ACZ essay cum story writing competition nung 1st adokba article ya nübortem ajak ajangzüktsü asoshi adoktsür) First Ao Confession Zone Eassy cum Story writing competition nung takoker # Andrew Mayang, Mokokchung District

ANATIA KOMA BILEMER
Asenok ajaki metet, asen Naga lima nung,asen Aoer ya kin ajungai nükshia aliba merataket kin ka lir. Tanü Aori angatetdaktsünübaji; Socially, Educationally, Politically aser Religiously nung ajemdaker tesüiba aso nungi, tanü putu aser tarutsü putu Ao kin tia asoshi lemsateper.
Reprangdangang tesüiba aso nung ni shia aliba onük ajunga nungji, asen Ao kin mezüng ser Naga lima ajunga nung, asen Aoeriang anir, tenük lapoka aru. Anungji tsürabur tenüng aser yim tetshia, putusen lanurtem temulung Itshitsü asoshi..
Socially:-
Asen Naga lima nung British sorkar amenoker, Wang-wanga aliba mapang, tsürabur Late. LUKE SASONG, MANGMETONG aser Late. IMNAMEREN, CHANGKI, tenati anir tarutsü nükla tajung yur, British sorkar den tasü it-ita raratep-a, Ao kin asoshi mapa tajung inyaktsüba, tebangi rasa shir meshima asenoki angur. Saka item rongnung tanü tashi asen Tzükong trok sanger nem ajangzüktsüba, par mapa tajung kaji, Mokokchung town nung kari lenmang (Road) mesapoka yutsüba yong. yangji tanü asenok ajak tasoshia, chiyongtsü-aben-süoshi, benjongbentsü-Shirangshiko, ajunga nung jet-jet ta oli-ora süteta liteper.
Educationally:-
Naga nünger tepezük tia, meimchir ano tazü tia nung alidang, asen dangi zülu-azüngtsü metettsü,asoshi kaket shisatsü bushitsü aser nüchiba akümtsü maongka arua, Tebur rongnungi, Oboula Late. MAYANGNOKCHA, CHANGKI. Naga nunger rongnungi, Pai mezüng matriculate den mezüng Govt Middle School Head Master Inyak. Tsürabur mapang tetsürdem kaket shisatsü bushiba nung kangasa ajema liasü. Kechiaser tetsüri azüngbaji kecha nüngdak mali ta tangatetba alidang Mrs. PONGENTULA. AIER, SÜNGRATSÜ. lai Nagatsür rongnungi mezüng class trok, Impur Mission School nung pass asü. Matriculate asüba aser Class trok pass asüba, item ajungaji par mapangbo, joko aji atamata masü ta kangasa metsünga-reta ajaki züngshia liasü.
Politically:-
Asenok ajaki meteta lir, mezüng Chief Minister of Nagaland Shri. P. Shilu.Ao, LONGJANG. Pai Mezüng Chief Ministership abenbaji dang masü, saka pa mapa nung ochi ashiba, tanü tashi India nung tenüng tajung yuja lir. (Nagaland sanction meyipa yokba record) Aser ano Dr. S.C JAMIR, UNGMA. paibo India tatem tonga oa Governor mapa inyak. Aser tanüa teinyakdak ta asenok ajaki meteta lir.
Religiously:-
Asen Naga lima tammang tia nung alidang, Asen Ao kinisa mezüng Khristan yimsü agizüka tanem-tanem-i Naga lima ajunga nung Yisu Khrista temeim osangtajung sangoktsü, tanübo “NAGALAND FOR CHRIST” ta alima ajunga dangi sangdonga lir. Ano iba den Lai puti metetter Rev. LANU LONGCHAR, LONGKHUM. Paibo tanü pa taküm asa tao tashi, alima tatem tonga oa Tsüngrem temeim osang tajung sangdonga jajadaki.Yamaji tsürabur mapang nungi tanü tonga, asen Ao kina, Pi dang tejak tentettsüsa nokdaka arudar. Yongji Pi kini, asen Aor nem naroküm tenüng tajung “MR.CLEAN”, “THE LAND OF FASHION AND MUSIC” ta tetemsü tenüng aika jaloktsüdaki.. Saka aji agi tenük masüng asen sasa “THE LAND OF PIONEER” ta jateter liyonga odagi.
Hau, ken bilemtsübo The Land of Pioneers ta jatetbajia shitak amai dang. Saka Pi kinia asen sasa jatetba nungji kechi koma ka bilema jembia alitsü? Aser ano asen Aoeri sentong balala nung “THE VISION OF 2040″ Onük nung tashi-temetetteri jembiteper. Saka yamai dang asen Aoer ya alinungbo, 2040 tashi nungji kechi balaka alitsüa ka??
Anungji ni tekalen tajung rongnung, balaka nüngtuko, nisungtem tenüng ishika shia lir, itemji timbaka süadoker, asenok den mali. Saka tanü lanurtem-i moa nisung anabo, tanü tonga par mapa nungji nokdaka asenok den taküm lir.
DR.S.C JAMIR GOVERNOR OF ODISHA
Aser
Rev. LANU LONGCHAR. Sakasa temenungratsüka tena prongla joko küm nung kanga tain tambur kümadoker. Ajungben asenoki tenük agi mangutsüsa, par ali mapa renemer Zionlen jagi oadokra, asen Lanur Aoer rongnungia tanabuba Dr.S.C JAMIR amai shibai kümtettsü (?) Mesüra Tanabuba Rev.LANU LONGCHAR amai Shi Kümtettsü (?) (Next Dr Sc Jamir or Next Rev Lanu Longchar) Anungji adianu tajungtem, asenok Aoer-i Jembiba ama ” Vision Of 2040 ” ta mangdang nükla yur “The Land Of Pioneers” ta jatetbaji, asangsang nung, pi kin danga litetta sayutsü meji, tulu-tila ajungai kanga junga bilemdanger, Pei juri khuret ka amai bilema TSÜNGREM dang taochi meshia sarasademer, kati ka den jungtepa, meimtepa, yaritepa, pei wadang nung temulung taliba agütsüshidi ni ta, asen Ao kin, Naga lima asoshi lemsateper.

Purmayang Jamir
Aongza Ward, Mokokchung
(# Andrew Mayang. Fb account)

You must be logged in to post a comment Login