Anatsülen ; 1 Korint 12:12-27

Nenoki osangtajung tamang atema merangtepa, nenok tanela ka nung, temulung ka sür akangakanga noktakang. Filipi 1:27
“Kong ana mesüra asem kü tenüng nung sentepa lir, idakji Ni dena lir.” Mathi 18:20.
Ibai arogo Kiburi Khristan telok tekülemertem nem agütsüba senti tenangzükba lir. Khristantem telok iba temang nung lungjema alir. Pauli tenzükba mapang arogotemji tamang aser tesayuba nung lungjema liasü. Kodang Yirusalem ayawara adoka nüburtem timtema liasü, Pauli nüngdakba purtemji yaritsü ajungshi.
Kibuba Yisui Pa nütsüngtem nem agütsüba mapaji tulu liasü- alima ajak nung sayutsüngitsüba. Kija Khristan kati iba mapa tulu inyaktsü makok. Telok kati dang ibai inyaktsü makok saka Khristantem aser telok telungjem agi dang Khristai agütsüba mapaji Pa asoshi inyaktsü akoktsü.
Kong telok aser arogo tamang aser tesayuba nung lungjemer noktaker Khrista asoshi mapa inyaker iba telok aser arogo temoatsüba. ” Asenok melemsa; ajak temang ka, teyima ka aser tesayuba ka, temeim ka nung.” Iba arogo tashi tait army ama tejakleni aotsü aser Khrista asoshi alimaji akoktsü. Khrista Yisu nung tamang ka sür asenoki lungjemer ajaklen noktaker shirnok asenok den lir parnok nem Khrista osangtajung temerükji agüja parnok nem teti taküm agütsür.
Onok arogo tashi itdakjang, temeim Kibur, iba telungjem jagi onok Nai mulungba inyaktsü. Amen.